Qaqortumi aalisartoq arnarluit suaasa akii pakatsissutigigai: Ajoriivillugu ajorivara

- Ajoriivillugu ajorivara taamak killittoqarnera, akuerineqarsinnaangilaq.

Qaqortumi aalisartoq, Jens Peter Kielsen taama oqarpoq. Taanna Qaqortumi aalisartut piniartullu peqatigiiffianni aamma siulittaasuuvoq.

Taanna ulluni makkunani suannialereerpoq. Ilorrisimaanngitsorujussuuvorli.

Ilorrisimaannginnera KNAPK-p Royal Greenlandillu arnarluit suaasa kiilumut akiinut isumaqatigiissuteqarnerannut tunngassuteqarpoq.

Arnarlunniarneq apriilip aallaqqaataani aallartereertussaagaluarpoq, illuatungeriilli akornanni kiilumut akinik isumaqatigiinngittoqarnera pissutigalugu aalisartoqarsinnaanngilaq.

AAMMA ATUARUK KNAPK kunne ikke presse prisen op på stenbiderrogn: Vi var nødt til at acceptere det

Tamanna KNAPK-p aaqqissugaanik Royal Greenlandimut sapaatip akunneraata siuliani akerliussutsimik takutitsinermik kinguneqarpoq.

Aalisartut piniartullu kattuffiata kiilumut 53 koruuneqartinniaraluaraluarai Royal Greenlandip 22 koruunimik akeqartinniarpai.

Illuatungeriit ulluni 18-ini isumaqatigiinngereerlutik kiilumut akit ataasinngormat isumaqatigiissutigaat. Kiilumullu 22 koruuni bonusimullu 1 koruuni isumaqatigiissutigineqarpoq.

Tamanna Qaqortumi aalisartup, Jens Peter Kielsenip pakatsissutigingaatsiarpaa.

- Oqaluttuarisaanermi isumaqatiginninniarnermi immaqa aatsaat taamak ajortigisumik killittoqarpoq.

Akilerneqartariaqartunik akiligassaqartuaannarpugut

KNAPK-p siulittaasuata, Nikkulaat Jeremiassenip aalisartoqarsinnaaniassammat aalisartullu utaqqikatakkunarmata kiilumut aki taanna akueriinnartariaqarsimallugu nassuiaatigaa.

Jens Peter Kielsenip kiilumut aki isumaqatigiissutigineqartoq kamaatigaluarlugu tamanna aamma isumaqatigaa.

AAMMA ATUARUK Nipisaat suaannik aalisartut akerliusut: Akit qaffanngippata aalisarnianngilanga

- Aamma akiligassaqartuaanavippugut, tamakkua akiligassat aamma akilerneqartariaqarput.

Taassuma nunattalu kujataani aalisartut allat kiilumut akit politikkikkut qisuariarfigineqarnissaat neriuutigisimagaluaraat ilanngullugu oqaatigaa, aalisartut allaat ulluni tallimani suliumajunnaarnissaat siunnersuutigisimagaluarpaat. Aalisartunilli allanik utaqqikatattoqalersimavoq.

- Aalisalerusupput, aamma paasisinnaavakka soorunami, taamaammat akueriinartariaqarparput taamatut inissinneq.

Pisassiissutit tamakkernissaat neriuutigigaa

KNAPK-llu Royal Greenland tonsimut qanoq annertutigisumik tunitsivigisinnaanera iluatsitsivigilaarpaa. Aallaqqaammut 700 tonsit tunineqarsinnaagaluartut taakku 800 tonsinngortinneqarput.

- Tassa pisarnittut uanga, aamma neriuppunga ilaasortagut maani, ingammik kujataani taakua pisassagut pisariniarsarissagigut, aamma sila soorunami naalagaavoq, aamma neriuppunga ajunngitsumik naammassineqarumaartoq.

Nunatta kitaani arnarluit suaannik tunitsiviit arfineq-marluupput, taakkunannga tallimat ammapput.

Sisimiut eqqaanit Nanortalimmut arnarlunniartoqalereerpoq. Sisimiunit avannaanut arnarluit suaannik tunisisinnaalernissaq suli ullulerneqanngitsoq, Naalakkersuisut allapput.

Ingerlatsivinni tamani ullut aalisarfiit 60-iupput, imaluunniit pisassiissutit tamakkerneqarnissaannut.