Qaqortumi politiit Peerstaat Isaksen pillugu: Suli misissuisoqarpoq
Politiit tammaaneqartumik Peerstaat Isaksenimik ataavartumik ujaasinertik sapaatip akunnerata siuliani unitsippaat.
Politiit taassuma tammarneranik misissuigaluarput, arnalli 35-nik ukiullip, novembarip ulluisa 22-annili ujaarineqalersup sumiinneranut paasissutissarsinatik.
- Ajoraluartumik suli nassaarinngilarput, taassumali tammarneranut atatillugu inunnit saaffiginnittunik suli tigoqqaavugut. Taakku assersuutigalugu tassaasinnaapput tammaaneqartumik piffissap ilaani takunnissimasut.
Arnaq Peerstaat Isaksenimik ateqartoq ima nassuiaatigineqarpoq:
- 35-nik ukiulik
- 155 centimerit missaannik angissuseqarpoq
- Nerinnattoq
- Qorsummik taartumik qalipaatilimmik kavaajaqarpoq, aappilarujuttumik tujuuluaraqarpoq, qernertunik qarleqarpoq tungaasanillu qalipaatilinnik kameqarluni
Peerstaat Isaksen. Foto: Grønlands Politi.
Qaqortumi Politiini politikommissæriugallartoq, Kunuk Jakobsen oqarpoq.
Inunnit tammaaneqarneramut tunngatillugu paasissutissaateqarsinnaasunit saaffiginnittut politiit suli tigoqqarusukkaat, Kunuk Jakobsenip oqaatigaa.
- Soorunami saaffiginnissutit tamaasa tigoqqassavagut. Naak ujaasiunnaaraluarluta suliamik misissuineq suli ingerlavoq.
- Saaffiginnissutit tamaasa misissortarpagut, Kunuk Jakobsen oqarpoq.
35-nik ukiulik Peerstaat Isaksen novembarip ulluisa 26-anni maqaasineqartutut nalunaarutigineqarpoq.
AAMMA ATUARUK Namminneq kajumissutsiminnik ikiuuttut Peerstaat ujaaraat: Tammartoqaraangat attortisimanarpoq
Politiit paasissutissarsiaat naapertorlugit taanna kingullermik ataasinngornermi novembarip ulluisa 22-anni kommunip allaffiata eqqaani nalunaaqutaq 10.00-ip 11.00-illu akornanni kingullermik takuneqarpoq.
Politiit aamma allapput, unnuk taanna arnaq Tasersuup aqqutaatigutut nalunaaqutaq 23-p missaani illoqarfiup tungaanukartoq Brugseneeqqap eqqaani takuneqarsimasoq ilimagilluinnarlugu.
Tamatuma kingorna politiit Qaqortumi innuttaasut illuaqqani, naqqup-iluini biilinilu ujaaseqqullugit kaammattuiffigaat.
