Qeqertarsuarmi festivaalimik aaqqissuisoq: Inunnit nuannisartitsinissaq iluatsippoq

Nunatsinni angalaniarnermi ajornartorsiuteqaraluartoq Qeqertarsuarmi sapaatit akunnerata siuliani festivaali iluatsilluarluni innuttaasunit avataanersunillu katerisimaartitsiffiusoq, aaqqissuisoq oqarpoq.

- Aaqqissuussami pingaarnerpaaq iluatsippoq, tassalu innuttaasunik tamanik nuannisartitsinissaq. Inuppassut peqataapput, meeqqaniit utoqqarnut peqataallutik, Kommune Qeqertalimmi Timi Tarnimilu aqutsisoq, Felix Olrik KNR-imut allappoq.

Juulip ulluisa arfineq pingajuanniit qulingannut festivaali ualikkut nipilersorfiusarpoq, ullorlu ataaseq nerisassiorfiulluni. Taavalu Qeqertarsuaq racemik taaneqartumik arpannermik ulluni pingasuni unammisitsisoqarpoq.

AAMMA ATUARUK Festival i Qeqertarsuaq med løb, koncerter og madlavning

Festivalili sinerissami angallannerup putserneranik imarlunneranillu akornuserneqarneranit aamma sunnerneqarpoq. Qeqertarsuaq Festivaalimut peqataasussat, appittussat arpaqataasussallu kinguaattoorlutik tikipput.

- Angalaniarnerup unammillernarnera, kinguaattuullaarnerillu taakkuupput iluatsinnginnerusutut taaneqarsinnaasut, festivaalimi aaqqissuusseqataasoq allappoq.

Festivalimulli pilersaarutit naggataatigut iluatsipput.

Tulleriit, Paaliit Mølgaard, Uummatit kiisalu Knud Mathiassen peqatigalugu Siissisoq festivalertoqarnerani nipilersorput.

Aamma Georg Olsen Food Festivaalimik taallugu nunatta pissarititaanik arsaattarfimmi ullormi ataatsimi nerisassiorpoq, taakkulu piumasunut tamanut sassaalliutigineqarlutik.

AAMMA ATUARUK Nipilersortartut nilliapput: Malittarisassat ersarinnerusariaqarput

Coronavirusip tuniluunnera aaqqissuussanik ukiuni kingullerni taamaatitsisarpoq. Qeqertarsuaq Festivalili ukiuni taakkunani taamaatinneqartanngilaq, inuillu nunanut allanukarsinnaanerannut periarfissaqarpallaannginnamik Qeqertarsuarmut festivaleriartut amerlasarput.

Inuilli ukioq manna aallarfissaminnik qinigassaqarnerupput. Peqataasulli peqataajartorlutillu tikittut naamagisimaarneqarput.

- Inuit amerlassusaat naammagisimaarparput, naak inuppassuit Danmarkimut ukioq manna sulinngiffeqarnerminni aallakaangaluartut, Felix Olrik allappoq.

Kommune Qeqertalik festivaalimik aaqqissuisuuvoq.