Qeqqata Kommuniani Naleraq: Sooq taakkorpiaat sipaarniuteqarfiussanersut nassuiarneqanngilaq
Qeqqata Kommunia ukiup matuma sinnerani aappaagulu sipaarniuteqangaatsiassaaq.
Qeqqata Kommuniani Naleraq kommunip missingersuusiaasa tamarmiusut procentit marluk missaannik sipaarniuteqarfigineqarnissaannut akerliuvoq, massa amerlanerussuteqartunit Siumumeersunit, Inuit Ataqatigiinneersunit Atassummeersunillu akuerineqartoq. Tamanna Qeqqata Kommuniani kommunalbestyrelsip juulip sisamaanni immikkut ittumik ataatsimiinnerani pivoq.
AAMMA ATUARUK Qeqqani borgmesteri sipaarniarneq pillugu: Ulluinnarni inuuneq kalluarneqassanngilaq
Tassa missingersuusiat tamarmiusut 843.000.000 koruunit missaanniipput, taakkunanillu sipaarniutaasussat katillutik 16.882.441 koruuniupput.
- Sisimiuni Maniitsumilu unnuisarfiit - 1 millionit koruunit
- Maniitsumi ikiorsiissutit - 2 millionit koruunit
- Maniitsumi innarluutilinnut pisartagaqartitsineq - 1,5 millionit koruunit
- Asfaltilersuineq - 200.000 koruunit
- Arsaattarfinnik aserfallatsaaliinissaagaluit tamarmik taamaatipput
- Qatserisartoqarneq - 225.000 koruunit
- Ilinniartitaaneq - 7,2 millionit koruunit
- Aningaasaqarnermik ingerlatsineq - 2,5 millionit koruunit
77,2 millionit koruuninik 2021-p naanerani amigartooruteqarneq Qeqqata Kommuniata sipaarniuteqarneranut peqqutaavoq. Kommunillu ukiuni kingullerni ingerlatsinermut aningaasartuutai malunnartorujussuarmik qaffakkiartorsimasut, Siumut tunuliaqutaralugu Qeqqata Kommuniani borgmesteri Malik Berthelsen KNR-imut ilisimatitsivoq.
Sooq taakkorpiaat sipaarniuteqarfiussanersut nassuiarneqanngimmat sipaarniuteqarnissamut siunnersuut akerlerigitsik, Qeqqata Kommuniani Naleqqap gruppiata siulittaasua Abel Enoksen oqarpoq.
- Ataatsimiissutissatsinni ersipput kisitsisit sipaarniutissatut taakaattorneqarsimasut, kisianni sooq taakkorpiaat sipaarniutaassanersut taakkua ataanni nassuiaasersorneqarsimanngillat, Abel Enoksen oqarpoq.
Tamanna ilaatigut Sisimiuni Maniitsumilu unnuisarfiit ammarsarfiisa sivikillineqarnerannik Maniitsumilu ikiorsiissutissanut aningaasaliissutikinnerunermik tamaanilu innarluutilinnut pisartagaqartitsikinnerunermik kinguneqassaaq.
Isumaginninnermi suliaqarfiit 2022-mi 5,6 millionit koruuninik 2023-milu 8 millionit koruunit missaannik aamma sipaarniuteqarfigineqarput.
Aamma ilinniartitaanermik sullissineq 7,2 millionit koruuninik ukioq manna ileqqaarfissarsiorfiussaaq, teknikkeqarnermillu suliaqarfiit 1,5 millionit koruuninik ukioq naatinnagu ileqqaarutaassallutik.
Kommunip suliffeqarfiutaani sulisut annaanniaraat
Qeqqata Kommunia sipaarniuteqartariaqartoq, Abel Enoksenip miserratiginngilaa. Sipaarniuteqarfigineqartulli kommunalbestyrelsip pisortaanerillu, kommunalbestyrelsip sapaatit akunneranni uani immikkut ittumik ataatsimiinnerani peqataasimanngitsut, suleqatigiinnerisigut aaqqissuunneqartariaqartut, Naleraq isumaqarpoq.
AAMMA ATUARUK Qeqqata Kommuniani unnuisarfiit, ikiorsiissutit innarluutillillu sipaarniuteqarfigineqangaatsiartut
- Soorunami sipaarniartoqarnera imminermini ajunngilaq, kisianni utoqqaat illuini sulisut, innarluutillit illuini sulisut kommunillu iluani sulisut allat eqqarsaatigisariaqarpagut, Abel Enoksen oqarpoq nangillunilu:
- Taakkua annertoorujussuarmik eqqorneqartussaapput. Kommunip suliffeqarfiutaani sulisut ilaat sipaarniarfigineqarnissat pillugu suliffitsik qimaannartariaqalerlugu eqqarsartut aamma tusarpara. Tamakkua annaanniarutsigit kommunimi arlaatigut ataatsimeeqqittoqartariaqarpoq.
Sipaarniarneq sapinngisamik innuttaasunut ”annernannginnerpaaffimminiitinniarneqartoq”, Qeqqata Kommuniani borgmesteri KNR-imut ippassaq sisamanngornermi oqarpoq.
- Sapinngisamik innuttaasunut ”annernannginnerpaamik” ujarlersimavugut sipaarniarnermilu isumaqarsimavugut tassuunakkut sipaarniartariaqarluta. Sapinngisamik sulisunik soraarsitsinaveersaarluta kisianni kommunep susassaqarfiini assigiinngitsuni ammasarfiit sivikillisinneqassapput, taanna oqarpoq.
Naleraq naluttarfiliorniarnernut tapersiisoq
Qeqqata Kommuniali sipaarniartariaqaraluarluni Sisimiuni ataatsimik Maniitsumilu ataatsimik suli naluttarfiliulersaarnera, Abel Enoksenip kommunalbestyrelsimi ilaasortaqatinilu aakuersaarpaat.
Taakkua katillutik 216 millionit koruunit missaannik akeqassapput, ingammillu aningaasaateqarfinnit aningaasalersorneqassallutik.
Qeqqata Kommuniata naluttarfiliornissaminut aningaasartuutissat minnerpaamik 10 procentii tassalu 21.630.000 koruunit nammineq akilertussaavai.
- Qangalili pilersaarutaareersut uagut Naleqqaminngaanniit tapersersorpagut. Innuttaasummi tamanna qangalili kissaatigisareermassuk. Aamma Maniitsumi innuttaasut naluttarfiliortitsinissamut aningaasanik nammineq kajumissutsimik katersinikuupput. Taamaattumik aamma isumaqarpunga naluttarfiliorniarnerit taakkua kommunitsinni eqeersaataalluassasut, Abel Enoksen oqarpoq.
Pilersaarutit malillugit Qeqqata Kommuniata naluttarfiit ingerlanneqarnerannut aningaasartuutit akilertassavai, taakkualu ukiumut 5 millionit koruunit 9 millionit koruunillu akornanniissangatinneqarput.
