Qimussertartut kattuffiat piumasaqaatinik suli naammassinninngitsoq: 200.000 koruunit annaagaat

Suliffeqarfiup Danske Spilip eqquiniaasitsissutaanik Tips-ernermi, Lotto-rnermi allanilluunniik eqquiniaanermi sinneqartoorutit assigiinngitsunut tunniunneqartarput.

Kattuffittut Tips- aamma lotto-mit tapiiffigineqassagaanni, ilaatigut suliniummut naatsorsuutit, pisup kingorna qaammatit pingasut qaangiutsinnagit, naalakkersuisoqarfimmut nassiunneqartussaasut, naalakkersuisoq oqarpoq.

Tamannali Kalaallit Nunaanni Qimussertartut Kattuffiannit, ukiuni kingullerni marlunni Avannaata Qimussersuaqareernerani malinneqarsimanngitsoq naalakkersuisoq oqarpoq. Tamanna KNQK-p ukioq manna qinnuteqarnerannut itigartitsinermut tunngavilersuutinut ilaavoq.

AAMMA ATUARUK Anthon Street Avannaata Qimussersuani ajugaavoq

- Qinnuteqarnerminni itigartinneqarput 2021-mi 2020-milu tapiiffigineqarsimanerminnut naatsorsuutaat takkussimanngimmata, kultureqarnermut naalakkersuisoq, Peter Olsen (IA) oqarpoq.

Taassuma kattuffik 200.000 koruunit missaannik ukioq mannamut qinnuteqaraluartoq eqqaamaniarpaa.

Siulittaasuusimasup naatsorsuutit paarigai

KNQK-mi siulittaasup, Mikkel Jeremiassenip, ukiuni taakkunani pineqartuni siulittaasuunnginnami siulittaasuusimasoq, Johan Olsen innersuuppaa.

- Suliat taakkua marluk nalaani siulittaasuunngilanga. Taamaattumik kattuffiup siulittaasorisimasaanut, Johan Olsenimut innersuuppakkit, Mikkel Jeremiassen oqarpoq. 

Johan Olsenip KNR-mut oqarnera naapertorlugu, taassuma naatsorsuutit pineqartut paarivai. Taakkualu naalakkersuisoqarfimmut nassiutissallugit oqarpoq. Qaquguli taamaaliussanerluni oqaaseqarfigiumanngilaa.

AAMMA ATUARUK Video: Avannaata Qimussersuaaraani ajugaasoq aqqutaani sanngusooraluarluni uteriaqqipallattariaqarsimavoq

Kattuffiit soorlu KNQK-tut ittut Tips- aamma lotto-mit suliniummut aningaasaliissutinik amerlanerpaamik 200.000 koruuninik pissarsisinnaapput. KNQK siunissami tassannga taperneqarumassagunik amigaataasut naalakkersuisoqarfimmut tunniuteqqaartariaqarpaat.

- Qinnuteqaqqinniarunik pinngitsooratik taakkua piumasaqaatit naammassisariaqarpaat. Piumasaqaatillu naammassissagunikkit, tassa imaappoq taakkua tapiiffigineqarsimanerminnut naatsorsuutit atorsimasatik uppernarsaatit nassiuttariaqassavaat, Peter Olsen oqarpoq.

Avannaata Qimussersua Inatsisartut aningaasanut ukioq manna inatsisaanni 750.000 koruuninik aamma aningaasaliiffigineqarpoq.