Rosa ningaajusani Tour de Francemi ajugaammat feeriarunnaarallartoq
Tour de Francemi ajugaaqqammertoq, Jonas Vingegaard, Danmarkimut ullumi pingasunngornermi tikikkami Københavnimi inunnit nuannattunit nalliuttorsiutigineqarpoq, Jyllandillu avannaani Glyngørimut aqagu sisamanngornermi angerlaruni nalliuttorsiutigineqaqqissaaq.
Jonas Vingegaardip sakiusaa, Rosa Kildahl, Rosa fra Bagedystenitut ilisimaarineqartoq, ningaajusami taassumalu ilaqutaata illuata eqqannguani najugaqarpoq.
Jonas Vingegaard arnaataalu Trine Marie Hansen taakkulu paniat Frida Københavnip Rådhusiani balkonngimiipput. Assi: Scanpix
KNR-ip Rosa Kildahl Frankrigimiit Danmarkiliarluni Amsterdamimi ippassaq marlunngornermi ualisoq akunneqqaleruttortoq attavigaa.
Tour de Francemi ajugaasoq, Jonas Vingegaard, danskillu allat Tour de Francemi aamma peqataasut Københavnimi Tivolimi ullumi pingasunngornermi nalliuttorsiutigineqarput.
Jonas Vingegaard aamma najukkamini Glyngøremi aqagu sisamanngornermi nalliuttorsiutigineqassaaq.
Ilaquttani biilertut malillugit sikkilerluni meeqqat sungaartumik tujuulullit suluusallillu timersortarfissuarmukaqatigissavai.
Glyngøremi provsti morgmesterilu ualikkut oqalugiassapput.
Rosa Kildahl Frankrigimi feeriaraluarpoq. Ningaajusamili Tour de Francemi ajugaanera Danmarkimi nuannatigineqaqaluni nalliuttorsiutigineqarneranut peqataajartorluni feeriarunnaarallarpoq, tallimanngorpallu feeriarfimminukaqqissalluni.
- Inuuninni immaqa ataasiaannarlunga misigisussaavara, Rosa Kildahl oqarpoq.
- Ningaajusama ajugaanera eqqaamaneqartuarumaarpoq. Kinaluunniit taama angusaqartoq malinnaaffigalugu nuannertaqaaq, Kalaallit Nunaanniittullu taama aamma misigisimassasut qularinngilara.
Qasuersernissara aamma pisariaqartittarakku
Taamaammat Rosa Kildahl feeriarunnaarallarpoq.
- Aallartinneraniimmi malinnaaffigigatsigu naggaterpiaanut malinnaaffigissavarput. Jonasimi Danmarkimi inunnit nalliuttorsiutigineqaraluaqaluni ilaquttani aamma peqataatikkusuppai.
- Jonasilu ajunngilaq. Timersullammassuimmi Jonasitut ittut timersuutinit soorlu Tour de Francetulli ittunit sunnertingaartanngillat.
- Nissumigut qasuallaarunanngilaq. Nutaarsiassaqartitsivippassuilli, apersorneqaqattaarnini pisorpassuillu allat pillugit pullaaqinerugunarpoq. Ukiormi kaajallallugu ullut tamarluinnaasa sikkilertarpoq, Jonas Vingegaardip sakiusaa oqarpoq.
AAMMA ATUARUK Assit: Jonas Vingegaardip Tour De Francemi ajugaanini ilaquttanilu nalliussigaa
Jonas Vingegaardip aappaa, Trine Marie Hansen, Rosa Kildahlip panigaa. Aappariillu taakku paniat, Frida septembarimi aappiissaaq. Angutaatalu panini kissumiarlugu tuteraasamut qaqeqatigisarpaa.
- Sapaatit akunnerini kingullerni marlunni malinnaaffigisinnaagakku qujanarpoq. Frida Trinelu ilagisarpakka. Sikkilertut ornigullunga takusartarpakka, akunnittarfimili ininni isiginnaarutikkut aamma malinnaaffigaakka. Qasuersernissarami aamma pisariaqartittarakku.
Tallimanngorpat Frankrigimukaqqissasut
Fridalu pikkoreqisoq, Rosa oqarpoq.
- Arni uangalu eqqaaniikkutta naammagaa. Takoqqinnissaa massakkorpiaq qilanaarinerpaavara. Juunip 28-annili (Tour de Francep Københavnimi Tivolimi aallartinnissaanut ullut pingasut sioqqullugu, aaqq.) ulloq unnuarlu ilagisarpara. Maqaasivara, Rosa oqarpoq.
Fridap qasuarsernissani aamma pisariaqartilersimarpasippaa. Assi: Scanpix
Tallimanngorpamiit sapaatit akunnerata tulliata tungaanut qasuersissalluni, Jonas Vingegaard ajugaareerami oqarpoq. Taanna danskerpassuarnit Champs-Élyséesimut orniguttunit nersorneqarmat, kunngissaq Frederik ministeriunerlu Mette Frederiksen aamma najuupput.
Rosali uinilu ulluni arfineq-marlunni feeriariartoqqillutik Frankrigimukaqqissapput.
- Ulluinnarni inuunertik atoqqilerniassavaat, taanna oqarpoq.
Sakiusatut qanoq tulluusimaartigivit?
- Nuannaarnera 1-imiit 10-mut nalilissagukku 12-imeeqqinnaarpunga.
