Russit sakkutuui Donbasimi illoqarfimmit pingaarutilimmit Lymanimit peersinneqartut

Russit sakkutuui Ukrainep kangisissuani illoqarfimmi pingaarutilimmit Lymanimit annisinneqartut, Ukrainep præsidentiata Volodymyr Zelenskyj-p sapaammi oqaatigaa.

Illoqarfiup Lymanip, nunap immikkoortuani Donetskimiittup, tiguarneqarsimaneranik Ruslandip
nalunaarutigeqqammereeraluaraa illoqarfik taanna maanna tassa aniguisinneqarpoq.

Ukrainep kangisissuani nunap immikkoortui sisamat Ruslandimut ilaalersut Ruslandip præsidentiata Vladimir Putinip tallimanngormat nalunaarutigaa, allakkat atsiornerisigut tamanna pivoq, Donetskilu taakkununnga ilaalluni.

Russit sakkutuui illoqarfik Lyman upernaaq manna sivisuumik tiguarniarsaraat, piffissamili kingullermi tatineqarnerulersimallutik, illoqarfilli sapaatit-akunnerata naanerani qimavittariaqalersimallugu.

Ukrainep kangisissuani Donbasimi nunap immikkoortuinik tiguaaqqinnissartik Zelenskyj-p ippassaq arfininngornermi oqaatigaa.

Illoqarfiup Lymanip Ukrainep sakkutuuinit tiguaqqinneqarnerata takutippaa Ukrainemiut siuariartortut, russillu sakkutuuisa peersissinnaagaat, Nunat killiit illersoqatigiiffiata NATO-p qullersaata Jens Stoltenbergip ullumi sapaammi oqaatigaa.

Illoqarfik Lyman, Ukrainep kangisissuani pingaarutilerujussuartut inissisimavoq. Tassami inissisimaffia sakkutuunut pingaarutilerujussuuvoq, angallattummi Lyman aqqusaartugarisorujussuuaat.