Sakkortusaataasumik kapitissinnissaq imaluunniit? Qaqortormiut sissiukkamiittut tamanna qularutiginngilaat
Juullimut orpiliaq Qaqortumi tissaluttumi ikinneqareerput, aputillu illut aappaluttut ungalusimavaat.
Alluitsup paamiu Lars Poulsen kalaalimineerniarfiup eqqani qeqqisimavoq, taanna marloriarluni Coronamut akiuussuserneqareerpoq, pingajussaanillu kapitinnissaq piffissanngulermat atorluarusuppaa.
- Aap kapitissaanga aamma, perusuppara illersuutaasammat Coronamut.
Taassuma ungasinngisaani aamma atorluaarusuttoqarpoq. Kalaalimineerniarfimmi sulisoq, Egede Gabrielsen pingajussaanik aamma kapitikkusuppoq.
- Tassa pinasuartumik kapitikkusuppunga annilaanganarami aamma, taanna KNR-imut oqarpoq.
Assi: Egede Gabriel Qaqortumi kalaalimineerniarfimmi sulisoq.
Naalakkersuisut nakorsaanerlu corona pillugu killinnik nutaanik paasissutissiillutik ippassaq tusagassiortunik katersortitsipput.
Coronavirusimmi ilaat Omikron juullikkut nalaanni nunatsinnut anngutereersimanngikkuni anngutissagunartoq, tassani oqariartuutigineqarpoq.
Taamaammat oqartussat sakkortusaataasumik kapuinissaq siuartippaat, taamaalillutik 40-leereersimasut pingajussaanik sukkanerusumik kapitissinnaalerlutik.
Lisbeth Bianco taakku ilagaat. Taassuma kapitinnissani annilaangagisarsimagaluarlugu sungiutilersimanerarpaa.
- Kapuutit ersigipajaartaraluarakkit siullermik kapitikkama pullappoq, ajunngilaq, aappassaa kapitikkama immaqa annilaangasimangaarama aanaalaarpoq, taava pingajussaa utaqqivara kapitinnissara, Lisbeth Bianco oqarpoq.
- Tusaamagakku imatut annikinnerusumik napparsimasartut tunillatsissimasut, taava uanga taanna pingajussaaneernissaq utaqqiinarpara.
Assi: Lisbeth Bianco coronamut akiuussutissamik pingajussaanik aamma kapitinniarpoq.
Nunatsinni innuttaasut 67 procentii akiuussutissamik aappassaaneerlutik maanna kapitissimalerput. Lars Poulsenilli amerlanerusut akiuussuserneqarumanissaaat kissaatigaa.
- Neriuutiginarpoq allat aamma pingajussaaneernissamut kapitissinnaanerat, neriuppunga aamma pinngitsoornatik pisariaqartissagaat, Lars Poulsen oqarpoq.
Lisbeth Bianco pingajussaanik kapitittoqarnissaanut aamma kaammattuuteqarpoq:
- Arlariit kapitinneqanngitsut oqarfigisaraluarpakka soorunami, taava allatut akisaramik, tassa inuk nammineq, taamaammat uanga kapitiffissat tamaasa kapitiffigerusuppakka qaqugumulluunniit.
Innuttaasut 40-leereersimasut aappassaanik kapitinnermit qaammatit sisamat affarlu qaangiunneranni pingajussaanik kapitissinnaapput.
