SAS pisarnermisut ulluni tulliuttuni timmisartuussileqqissangasoq

SAS pisarnermisut ullualunni tulliuttuni timmisartuussileqqissangavoq.

Timmisartortartullu suliumajunnaartut nutaamik ataasinngornermi isumaqatigiissuteqareerlutik, timmisartuutileqatigiiffik nittartakkamini taama allappoq.

Timmisartortartut suliumajunnaarnerat peqqutaalluni SAS-ip sapaatit akunnerini kingullerni marlunni timmisartuussinissaraluanik taamaatitsisariaqarlunilu kinguartitsisariaqartarsimavoq.

Nutaamilli isumaqatigiissusiortoqareersorlu timmisartortartut suliartoqqimmata, SAS timmisartuusseqqittalertussanngorpoq.

Aatsaalli ullualuit qaangiuppata pisarnermisut timmisartuusseqqittalissangalluni, SAS nalunaarpoq.

- Pisarnitsitulli timmisartuusseqqittalinnginnitsinni kinguartitseqqittariaqarsinnaagatta ulluni tulliuttuni timmisartuussinissaraluatsinnik taamaatitseriaannaavugutt, SAS nittartakkamini allappoq.

AAMMA ATUARUK Svenskit isumaqatigiissitsiniartartuat: SAS-imut ullumikkut isumaqatigiissuteqartoqarsinnaavoq

Timmisartuutileqatigiiffilli pisarnermisut qaqugorpiaq timmisartuussileqqissanera eqqoriaruminaatsoq, Danmarkimi SAS-ip tusagassiisartuunerata Alexandra Lindgren Kaoukjip ilanngullugu oqaatigaa.

- Aatsaat ullualuit qaangiuppata piareerluinnassaagut, Alexandra Lindgren Kaoukji oqarpoq.

Timmisartut ilarpassui sapaatit akunnerini kingullerni marlunni angallassissutaanikuunngimmata aatsaat ulluni tulliuttuni piariivissallutik, Danmarkimi SAS-ip tusagassiisartuunera oqarpoq. Taamaammat timmisartut angallassissutigileqqitsinnagit piareersarneqaqqaartariaqartut, taanna ilanngullugu oqarpoq.

Suliumajunnaartoqarnerani timmisartuussinngitsoornerit atuutiinnassapput.

Ilaasussat mittarfiliannginnerminni aallarnissamik pilersaarusiorneqarnerat SAS-ip nittartagaani misissoqqaartassagaat, SAS kajumissaarivoq.

SAS-ip timmisartuussinissaata ilarpassui pilersaarutit malillugit tingillutillu missasut, Københavnip mittarfeqarfiata nittartagaani marlunngornermi allaqqavoq.

Timmisartuussinissaraluili ataasiakkaat soorlu USA-mut taamaatinneqarsimapput.

Ilaasussaminik pilersaarutit sapinngisamik malillugit timmisartuussinissani ilungersuutigigini, SAS nittartakkamini erseqqissaavoq.

- Suliumajunnaartoqarnera peqqutaalluni aallanngitsoorsimasut utoqqatserfigaavut, ilaasussanillu sapinngisamik tamanik timmisartuussinissarput ilungersuutigaarput, SAS allappoq.