Svenskit isumaqatigiissitsiniartartuat: SAS-imut ullumikkut isumaqatigiissuteqartoqarsinnaavoq

SAS-ip suliffiullu timmisartumi aquttuisa akornanni ataasinngornermi isumaqatigiissuteqartoqarsinnaasoq, svenskit isumaqatigiissitsiniartartuisa ilaata, Claes Stråthip ilimagaa.

SAS timmisartumini aquttunut juulip ulluisa sisamaannili suliumajunnaartunut svenskit isumaqatigiissitsiniartarfianni Stockholmimi isumaqatigiissuteqarniarsarivoq. Timmisartumi aquttut SAS-ilu Stockholmimi akunnerni 33-ni isumaqatigiinniareerlutik sapaammi unnukkut kingusissukkut avissaarput.

Svenskit isumaqatigiissitsiniartartuisa ilaat isumaqatigiinniarnermi ilaasut, Claes Stråthip sapaammi isumaqatigiinniarnerit siuariarfiusut sapaammi unnukkut oqaatigaa.

Taassuma svenskit nutaarsiassaqartitsiviat, TT isumaqatigiinniartoqarnerata kingorna oqaloqatigigamigit illuatungeriit isumaqatigiinniarnerit uteriarfiunerat pissutigalugu avissaannginnerarpai.

- Naamik taamaattoqanngissoraara, kisianni apeqquterpassuullutillu annertupput, taanna oqarpoq.

- Kajumittoqaqqilissappat – nalunngilaralu taamaattoqassasoq – taama tamanna ullaap tungaani (ataasinngornermi aqq.) aaqqiivigineqarsinnaavoq, kisianni piareertinnagu nutaarsiassaqanngilaq.

Isumaqatigiinniarnerit naammassiuminaatsut

SAS-ip SAS Pilot Group timmisartumi aquttut Danmarkimi, Sverigemi Norgemilu peqatigiiffinnit assigiinngitsuneersut pillugit isumaqatigiinniartuusoq isumaqatigiinniarfigaa.

Timmisartumi aquttut isumaqatigiissutaat kingulleq apriilip ulluisa aallaqqaataani atuukkunnaarpoq. Tamatuma kingornatigut illuatungeriit nutaamik isumaqatigiissuteqarnissartik iluatsinngilaat.

AAMMA ATUARUK Immikkut ilisimasallip SAS-imi sukkasuumik isumaqatigiissuteqartoqarnissaanut neriuutissaqarsorigaa

Timmisartumi aquttut SAS-ip coronamik nunarsuaq tamakkerlugu tunillaassuuttoqarnerata kingornatigut timmisartumi aquttunik SAS Scandinaviamit coronamik tuniluuttoqarnera pissutigalugu soraarsinneqartunik atorfinitsitseqqinnatik piginneqatigiiffimmit allamit aqutanit marlunnit SAS Linkimit aamma SAS Connectimit timmisartumi aquttunik atorfinitsitsisalernerat ilaatigut ilorrisimaarutiginngilaat.

AAMMA ATUARUK SAS-imi suliumajunnaarneq: Apollop ilaquttaatalu timmisartoq ilaaffissaat taamaatiinnarneqartoq

Claes Stråthip isumaqatigiinniarnermit pissarsiat qanoq annertutiginersut TT-mut oqaatigiumanngilaa. Nunaniilli assigiinngitsunit pingasunit timmisartumi aquttut assigiinngitsunik peqatigiiffillit pillugit isumaqatigiinniarnerit naammassiuminaatsuusut erseqqissaatigaa.

Pissutsit ataqqinanngitsuliornerusut

Danskit timmisartumi aquttuinut siulittaasup, Henrik Thyregodip isumaqatigiissuteqartoqassanersoq ullumi paasinissaa naatsorsuutigaa, NTB allappoq.

- Ataqqinanngitsuliorneruvoq. Isumaqarpunga SAS-ip maannamit sivisunerusumik suliumajunnaarfiunissaa ataqqinanngitsuliornerussasoq. Tamanna timmisartumi ilaasartunut suliffeqarfimmullu ataqqinanngitsuliorneruvoq, taanna ataasinngornermi oqarpoq.

- Timmisartuutileqatigiiffimmi ukiuni 32-ni sulivunga. SAS nuannaraara. Isumaqarpunga taama ingerlaannartoqarsinnaanngitsoq.