Savalimmiormiu politikeri nuimasoq akiuussuserneqarusunngikkallartoq
Savalimmiormiut nunanut allanut tunngasunut ministeriat coronamut akiuussuserneqarusunngilaq.
Savalimmiormiut Nutaarsiassaqartitsiviat taama allaaserisaqarpoq.
Jenis av Rana nakorsatut ilinniarsimasuuvoq - taassumalu akiuussuserneqarusunnginnera savalimmiormiunut takutitsinerlunnerusoq, lagmand, Bárður á Steig Nielsen isumaqarpoq.
Savalimmiuni naalakkersuisoq, Jenis av Rana kristelige Miðflokkurinimi siulittaasup akiuussuserniarneqarani Vp.fo-mut oqaatigaa. Taassumami piffissami ungasinnerusumi kingunerluuteqarsinnaanerat annilaangagaa.
Taassumali akiuussutissap sunniutai ilisimallualerunigit akiuussuserneqarnissani mattutinngilaa.
AAMMA ATUARUK Tusagassiorfik: Suliffeqarfimmi aqutsisut innuttaasut qaangiinnarlugit akiuussuserneqartut
Savalimmiuni akiuussutissaq Pfizerimeersoq kisimi maannamut atorneqarpoq.
Naalakkersuisunut ilaasortaq taamaalilluni naalakkersuisut nammineq ilaaffigisami innersuussutai illuatungilerpai.
- Akiuussutissanit piffissap sivisuup qaangiunnerani sunniutaasussat annikippallaamik ilisimasaqarfigivagut, Jenis av Rana oqarpoq.
Lagmandip, Bárður á Steig Nielsenip Sambandspartiimeersup suliaq "ajuusaarnartuunerarpaa".
- Naalakkersuisunut ilaasortat akornanniassigiinngitsumik isumaqartoqarnera nutaajunngilaq, kisianni soorunami ilaasortanit isummaminik tamanut saqqummersitsisoqarnera ajoqutaavoq. Suliaq qaqissavarput, taamaattoqaqqissanngilarlu, Bárður á Steig Nielsen Kringvarp Føroyamut oqarpoq.
Savalimmiuni coronamut tunillatsissimasutut uppernarsarneqarnikuusimasut 671-iupput. Taakkunannga ataaseq toquvoq.
Nunatsinni coronamik tunillatsissimasutut uppernarsarneqarnikuusimasut 34-upput. Taakkunannga marluk piffissami matumani tunillatsissimasutut uppernarsarneqaqqapput - sinneri allat peqqisseqqinnikuupput.
