Savalimmiut russit umiarsuaannut talissinnaatitsisoq
Nunat Killiisa amerlanerpaartaasa Ruslandimut Ukrainemut saassussinerata kingunerisaanik Ruslandimut kinguneritinneqartut annertuut atuutilersinnikuuaat. Savalimmiunili Ruslandimut kinguneqartitsinissamut ulapputeqartoqanngilaq.
Savalimmiut umiarsualiviani russit umiarsuai amerlasuut suli uninngapput. Tamanna pivoq naak EU-p kinguneqartitsissutissat nutaat ilaatigut russit umiarsuaanik EU-mi nunat umiarsualivianut talissinnaatitsinnginnissamut ilaqartut apriilip ulluisa 16-ianni atuutilersereeraluarai.
AAMMA ATUARUK Royal Greenlandip Ruslandimut niuernini unitsikkaa
Savalimmiut EU-mi ilaasortaanngilaq. Kisianni Savalimmiut EU-p Ruslandimut kinguneqartitsissutaanik malinninniartoq, Savalimmiuni nunanut allanut tunngasunut naalakkersuisup, partiimit Miðflokkurinimeersup, Jenis av Ranap savalimmiormiut tusagassiorfiannut Kringvarpimut marsip aallartinnerani oqaatiginikuuaa.
- Kinguneqartitsissutaasut atuutilersinneqartut tunngaviusumik peqataaffigaagut.
Taamaakkaluartorli maanna Ruslandip Ukrainemut saassussineranit qaammatit marluk qaangiukkaluartut umiarsuit russit erfalasuannik erfalasoqartut amerlasuut savalimmiormiut umiarsualivianni talinngapput. Tamanna tusagassiorfiup Kringvarpip aaqqissuisuata, Rólant Waag Damip DR-imut oqaatigaa.
- Umiarsuit (russit pigisaat aaqq.) savalimmiormiut umiarsualivianni aalartitsillutillu pujoorput. Initoorujussuupput, angipput nunaqarfinnilu talinngavigisaanni ersarilluinnarlutik.
AAMMA ATUARUK Russit saassussinerata issittumi suleqatigiinneq unitsikkallaraa
Tamanna Savalimmiuni maanna oqallisigineqangaatsiarput, illuatungiliuttullu naalakkersuisut Ruslandimut tunisanik tamanik inerteqquteqartoqartitsilernissaa piumasaraat. Aamma naak tamanna Savalimmiut aningaasaqarnerannut eqquissagaluartoq.
Savalimmiut avammut tunisaasa sisamararterutaat Ruslandimut tunisaasarput. Taakku 2011-mi 2,3 milliardit koruuninik aningaasartaqarput.
Savalimminit Folketingimut ilaasortaq, socialdemokratiske partiimit, Javnaðarflokkurinimeersoq Sjúrður Skaale isornartorsiuisunut aamma ilaavoq.
- Umiarsualiviit russit umiarsuaannut ammatitsissanngitsut isumaqarpunga. Aallaqqaammut oqaatigineqareersutulli EU malinneqartariaqaraluarpoq, Sjúrður Skaale Berlingskemut oqarpoq.
Savalimmiuni aalisakkeriviit annersaata, Bakkafrostip sorsunnerup aallarteqqammitsiarnerani Ruslandimut tunisaqartarnini unitsinniarlugu aalajangernikuuaa.
Danskit ministeriunerata, Mette Frederiksenip Savalimmiut EU-p Ruslandimut kinguneqartitsineranik malinninnissaa naatsorsuutigalugu arlaleriarluni erseqqissaatiginikuuaa.
