Sermersuup inatsit unioqqutippaa: Aqutsisup suliaritinnera akileramiuk

Kommuneqarfik Sermersooq ukioq kingulleq suliassanik ajorluinnartunik eqqugaasaqattaarpoq, pasillerneqarpormi aqutsisut qulliunerusut kommunep aningaasaataannik unioqqutitsillutik atuisimasutut.

Suliarlu alla aamma pisortat aningaasaataannik atuisoqarsimaneranut tunngasoq saqqummerpoq.

Danskit nutaarsiassaqarfiisa ilaata Den Uafhængigimik taaguuteqartup allagaatinik takunnissinnaatitaanini atorlugu Kommuneqarfik Sermersooq takunninnissamik qinnuigaa. Paasivaalu, atortortulersuisut ittuata Danmarkimi privathospitalimi isiminik suliaritinnera Kommuneqarfik Sermersuup 22.000 koruuninik akiliussimagaa

Kommunaldirektøriusimasup Lars Møller-Sørensenip isumaqatigiissummi ”aningaasaqarnermi peqquserluuteqartoqarsimaneranik pasinartoqartutut” taallugu oktobarip qaammataani politiinut unnerluutigaa.

AAMMA ATUARUK Kommunimi pisortaanerup suliffeqarfiutigisimasani kommunimut isumaqatigiissuteqartikka

Kommuneqarfik Sermersuumi atortorissaarutinut pisortaasup Gert Jacobsenip oqaluttuaq taanna danskit nutaarsiassaqartitsiviannut Den Uafhængigemut uppernarsarpaa:

- Sulisitsisora uannukarpoq oqarfigalungalu, akunnermuliuttutut inissisimagama, suliaritinnissara akilerneqarsinnaasoq, Gert Jacobsen, Den Uafhængigimut taama oqarpoq.

Gert Jacobsen nangilluni oqaluttuarpoq, isiminik suliaritinnissani nammineerluni akilerniarsimagaluarini, kommunimiilli neqeroortoqarsimanerarpaa akiliunneqarnissaanerarlugu.

Gert Jacobsen nangilluni oqaluttuarpoq, isiminik suliaritinnissani nammineerluni akilerniarsimagaluarini, kommunimiilli neqeroortoqarsimanerarpaa akiliunneqarnissaanillu neqeroorfigalugu.

Nutaarsiassaqartitsiviulli Den Uafhængigip Juramut ilisimatooq Sten Bønsing oqaloqatigaa, taannalu nassuiaavoq, tamanna inatsimmik unioqqutitsinerusoq, tassa kommunemi atortorissaarutinut pisortaq Danmarkimi isiminik suliaritippat kommunimiillu akilerneqarsimassappat tamanna unioqqutitsinerusoq.

- Tamakkua inuup nammineq akiligassarai. Kommunemmi pisortaqarfinnut attuumassutillit kisiisa akilertussavai, unalu pisoq erseqqippoq inuup nammineq akiligassarigaa, tassa privatimut tunngassuteqartuuvoq. Taamaattumik kommunemiit akilerneqartussaanngikkaluartoq, Sten Bønsing oqarpoq.

Taava imaappa, toqqaannartumik unioqqutitsisoqarsimava?

- Aap, taamaassimassaaq tassa unioqqutitsisoqarsimavoq.

Kommunaldirektøri: kukkuneruvoq, kisianni silatusaartumik aalajangernerusoq

Nutaarsiassaqartitsiviup Den Uafhængigip Kommuneqarfik Sermersuumi kommunaldirektøriusoq Ole Jacobsen attavigaa, taannami ukioq kingulleq novembarimi atorfinippoq.

Nutaarsiassaqartitsivimmut Den Uafhængigimut Ole Jacobsen oqarpoq, nammineq nalugini Kommunemi sulisut suliaritinnerini akiliunneqarsimappata tamanna qanoq naapertuuttuliornerutiginersoq. Oqaatigisinnaanerarpaali, tassunga tunngatillugu inummut ataatsimut tunngassuteqartumik naliliinerusoq, uungami killittoqartariaqarsimammat aaqqissutissaq pitsaanerpaassappat taassuma suliaritinnissaanut kommune akiliisariaqalersimasoq, tassami taamaalilluni Gert Jacobsenip napparsimalluni peqanngiffeqarnissaa sivikinneruniassammat suliffimminullu utilertupallanniassammat.

Nutaarsiassaqartitsivik Den Uafhængige Ole Jacobsenimut aperivoq, akiligassamik tassanga kommunep akiliisimanera unioqqutitsinerunersoq, kommunaldirektørilu ima akivoq:

Taamaappat kukkusumik aalajangiisimassaagut, tamannalu pillugu Kommunip aqutsisoqarfia oqaloqatigeqqaartariaqarpara.

Taamali oqariarluni Ole Jacobsen erseqqissaavoq, tamanna ajunngitsumik aalajangernerusoq.

- Tunngavimmigut ajunngitsumik aalajangerneruvoq, tassami sulisup sukkanerpaamik uteqqissinnaanissaa matumani pineqarmat, Ole Jacobsen oqarpoq.

Aperineqaqqipporli:

- Kinguneqartinneqassavami?

- Naamik, kingunissaa unaaginnassaaq, uagut assingusumik pisoqaqqinnissaanut periusissatsinnik suliaqarnissarput, taanna akivoq.

Ilisimaneqanngilarli Kommuneqarfik Sermersooq napparsimavimmut akiliuteqarnermi saniatigut aamma timmisartornera Danmarkimilu najugaqarnera akilersimaneraa.

Den Uafhængigemi Ole Jacobsenip apersorneqarnera tamaat uani tusarnaarneqarsinnaavoq facebookside.

KNR-p Ole Jacobsen oqaaseqartinniaraluarpaa, sulili saaffiginnissuterput akissuteqarfiginngilaa.