Seth Sethsen suli parnaarussivimmiissaaq
Seth Sethsen, taamani Helge Seth Nielsenimik ateqartoq 1985-imi Albertslundimi taxartartoq marloriarlugu aallaallugu toqoreeraalu aappaaguani inuunini naallugu parnaarussassanngortinneqarpoq.
Nammineq nassuiaanini naapertorlugu toqutsineq ajutoornermi pinerarpaa. Taassumami taxartartoq ujajaleruttoraa paalermata taxartartoq marloriarlugu aallaavaa.
Misiliummik iperangaanissani ukiuni kingullerni qinnutigisaraluarpaa, tarnilli pissusaanik ilisimasalimmik misissorneqaqqaarnissani itigartittuartarsimallugu.
Taassumami isumaa malillugu tarnip pissusaanik ilisimasallit qanorluunniit inerniliigaluarunik Danmarkimi Pinerluttunik Isumaginnittoqarfiup ulorianartutut nalilertuassanerarmagu.
Taamaammat Seth Sethsenip iperangaannginnissaanik Pinerluttunik Isumaginnittoqarfiup innersuussissutaa malinneqassasoq Glostrup-imi eqqartuussiviup ullumi aaliangiuppaa.
- Tassa Seth Sethsen anigallarnavianngitsoq maanna paasinarsivoq, illersuisua Bjarne Fabech-Larsen taama oqarpoq.
- Allat pineqartarnerattut pineqarusuinnarpunga, Seth Sethsen, ukiuni 26-ni parnaarussaaqqareerluni iperangaagallarnissani sapaatip akunnera kingulleq eqqartuussivimmut qinnutigiartormagu tusagassaqartitsivimmut Ritzau-imut taama oqarpoq.
Inuuneq naallugu parnaarussat ukiuni 16-ni parnaarussaaqqareeraangata iperangaasarneri naliginnaasuuvoq, ilaali suli sivisunerusumik parnaarussaaqqasinnaasarlutik.
Politiinimmi sisamanik toqutsinikoq Palle Sørensen ukiuni 33-ingajanni parnaarussaaqqareerluni aatsaat iperangaavoq.
Glostrupimi eqqartuussiviup aaliangiussaa landsrettimut ingerlateqqinneqassanersoq Seth Sethsenip illersuisuatalu maannakkorpiaq aaliangerniartussaassavaat.
