Seth Sethsenip misiligutaasumik iperagaaniarnera Eqqartuussiviit Qullersaanni suliarineqartussanngortoq

Inuunera naallugu parnaarussassanngortinneqarsimasoq, Seth Sethsen ukiuni 36-ni parnaarussaaqqareerluni misiliutaasumik iperagaassanersoq Eqqartuussiviit Qullersaata maanna aalajangiiffigisussanngorpaa.

TV 2 Lorry toqusisimasup eqqartuussissuserisuanik, Henrik Stagetornimik oqaloqateqarsimasoq taama allaaserisaqarpoq.

Ingerlatitseqqinnissamik aalajangiisarfik apeqqutip Eqqartuussiviit Qullersaanut ingerlateqqinneqarsinnaanissaa akueraa. Pinerluttunik Isumaginnittoqarfik 36-nik ukiullip Seth Sethsenip iperagaanissaanut isumaqataanani ingerlatitseqqinnissamik qinnuteqarpoq.

Pinerluttunik Isumaginnittoqarfiup taassuma iperagaanissaanut atugassarititaasunik aalajangiinissaa Østre Landsretip decembarimi aalajangiiffigaa.

Seth Sethsenip misiliutaasumik iperagaanissaa anguniarniarlugu, Henrik Stagetornip Ritzau-imut oqaatigaa.

- Landrettip aalajangiineranik aalajangersaanerussaaq, eqqartuussissuserisoq oqarpoq.

Taxartitsisumik aallaannilluni toqutsisoq

Eqqartuussissuserisup suliaq Eqqartuussiviit Qullersaanni qaammatini arlalinni aggersuni suliarineqarnissaa naatsorsuutigaa.

Seth Sethsen 1985-imi parnaarussaavoq.

Taassuma Albertslundimi taxartitsisoq taxani ingerlataani 1985-imi aallaallugu toquppaa.

AAMMA ATUARUK Inuunera naallugu parnaarussassanngortitaq Seth Sethsen misiliummik anisinneqartussanngortoq

Taamani 30-nik ukiulik, Seth Sethsen toqutsisutut ullualuit qaangiuttut tigusarineqarpoq. Tassuma taxartitsisumik, Kurt Gaarn-Larsenimik toqutsinini nassuerutigaa.

Taassumali nassuiaateqarnermini marloriarluni seqqorneri toqutsissutaasut tillinniarniarluni uivernermini aallaasoornerusut oqaatigaa.

Tarnikkut misissorneqarnianngitsoq

Eqqartuussiviit Qullersaata suliat tunngaviusumik apeqqutitaqartut aamma inatsiseqarnermi pissutsit ersarinngitsut ilaatigut suliarisarpai. Suliami matumani Seth Sethsenip tarnikkut misissorneqarusunnginnera immikkuullarissuuvoq.

- Tarnikkumi misissuisoqannginnera qanoq isumaqassanersoq apeqqutaavoq, Stagetorn oqarpoq.

Seth Sethsenip misiliutaasumik iperagaanissaanik landsrettip decembarimi aalajangiinnginnerani taanna iperagaanissamut arlaleriarluni itigartitsiffigineqarnikuuvoq.

Eqqartuussivimmi suliaq Østre landsretimi suliarineqarmat Pinerluttunik Isumaginnittoqarfiup eqqartuussissuserisuata, Camilla Skadborgip Seth Sethsen ukiorpassuarni suleqataajumasanngitsoq oqaatigaa. Tamannali Seth Sethsenip eqqunnginnerarpaa.

- Suleqataasannginnerarneqarnera ilumuunngilaq, Seth Sethsen eqqartuussivimmi killisiorneqarnermini ilaatigut oqarpoq.