Silap allanngoriartornera pillugu akiuiniaqatigiit 100-t sinnillit Amsterdammimi tigusaasut

COP27-mut ataatsimeersuartoqarnissaa ullormik ataatsimik sioqqullugu, silap pissusiata allanngoriartorneranut akiuiniaqatigiit timmisartoqarfimmi timmisartunik assersuipput, ersersinniarlugu qanoq timmisartut silaannarmut mingutsitsitiginerannik.

Allattoq Ritzau

novembarip 05-at 2022 18:42

Silap pissusiata allanngoriartornera pillugu akiuiniaqatigiit 100-t sinneqartut ullumi Amsterdamimi politiiniit tigusarineqarput, taakkumi Amsterdamimi privatimik timmisartut uninngaviannut isaallutik akerliunerminnik takutsitsipput.

Taama hollandimi tv-qarfik NOS tusarliussivoq.

Akiuiniaqatigiit timmisartoq kaajallallugu akunnerni arlalinni issiapput, timmisartoq privatimik pigineqartoq aallarnaveerlugu aammalu timmisartunik mittaaliuillutik.

Taakku taamaaliornerminni oqariartuutigaat timmisartumik angallannerup silaannarmik mingutsitsisaqisup aammalu silaannarmut ajoqusiisaqisup atorunnaarsinniarneqarnissaa.

Taamatut iliorluni akerliussutsimik takutitsineq Greenpeacekkkunnit aaqqissorneqarpoq.

Hollandimi naalakkersuisut juunimi saqqummiussipput ilaasut Amsterdamip timmisartoqarfiatigoortut annerpaamik 440.000-nik ukiumut ikilisinneqassasut, tassalu imaalissaaq 2019-mut naleqqiullugu 11 procentimik ilaasut ikilisinneqassapput.

Silaannakkut angallannerujussuaq peqqutaalluni silaannaap mingutsinneqarnera pisuutinneqarpoq.

Qaammalli kingulleq Hollandimi angallannermut naalakkersuisoq nassuerpoq, nammineq naalakkersuisoqarfigisami privatimik timmisartukkut angallattoqartarnera iliuuseqarfigisinnaanagu.

Taakku taama akerliunerannut peqqutaavoq aqagu sapaatiuppat Egyptenimi silaannaap pissusaa pillugu COP27-mik taasamik ataatsimeersuartoqartussaammat.

Nutaarsiassami kukkunermik nassaarsimaguit uunga allaffigineqarsinnaavugut.