Sisamassaanik kapoorneqaqqittussanngorpugut
Ukrainemi sorsuttoqarnerata nunarsuarmilu aningaasaqarnerup ajutoornerata coronap tuniluunnera puigortikkaluaraat, imaanngilaq taava corona qaangiuttoq.
Peqqinnissaq pillugu oqartussat maanna naatsorsuutigaat ukiaq manna corona utersaaqqissasoq, taamaattumillu innuttaasut illersorniarlugit 50-leereersimasunut aammalu inunnut tunillanneqarnissamut qajannartunut sisamassaanik akiuussusersuisoqartussanngorpoq.
Nunap nakorsaanera Henrik L. Hansen KNR-mut oqarpoq:
- Coronap nutaaliornerinut nutaanut akiuussutissaq sivitsuissut maanna Kalaallit Nunaannut eqqunneqareerpoq, taannalu kingusinnerpaamik jannuaarip 15-iani 2023-mi 50-leereersimasunut tamanut neqeroorutaavoq, taakkulu saniatigut aamma anigorsinnaanngisaminnik nappaateqartut neqeroorfigineqassapput, Henrik L. Hansen oqarpoq.
AAMMA ATUARUK Innuttaasunut Mimi Karlsenip kaammattuutaa: Uanga sisamassaa akiuussusertissaanga
Nunanit allaniimmi aamma nalunaarutigineqarsimavoq, nualluut nalinginnaasoq ukioq manna tuniluutingaatsiassangatinneqartoq, taamaammallu nualluummut tassunga aamma akiuussusersuisoqassaaq:
- Nualluummut atatillugu 65-leereersimasut tamarmik 2023-mi jannuaarip 15-iutinnagu akiuussuserneqarnissaannik neqeroorfigineqassapput, matumani aamma inuit tunillanneqarnissamut qajannartut pineqarput, nakorsaaneq oqarpoq.
Taamatummi ukiullit tassaapput pinartumik napparsimalernissamut tunillanneqarnissamut qajannarnerpaasut. Taamaammat pingaartumik utoqqaanerusunut sisamassaanik akiuussutissaq iluaqusiissasoq erseqqissaatigineqarpoq.
Saniatigut sunniutit peruluutaalersinnaasut ilimagineqanngillat
Coronamut akiuussutissap affaa akiuussutissaareersumik ”atorneqartareersumik” imaqarpoq, affaalu nutaaliaaneruvoq coronap allanngornerinut tamanut naleqqussartartussaavoq. Taamaammat naatsorsuutigineqanngilaq sisamassaanik kapitittut allanik saniatigut peruluutaalersunik malugisaqassasut.
- Ilimaginngilarput peruluutaalersunik allanik sunniuteqartitsisunik pilersitsissasoq, siunertarpummi uaniippoq inuit coronamik napparsimalerlutik perululinnginnissaat. Tassami piffissami aggersumi corona tuniluutilerataannaavoq, akiuussusersuiguttalu tamanna pinaveersimatissinnaavarput, Henrik L. Hansen oqarpoq.
AAMMA ATUARUK Omikronip allannguutaa nutaaq aasaru tuniluunnerpaalissasoq ilimagineqartoq
Nakorsaaneq naapertorlugu, coronamut tunngatillugu iliuusissiornerit piffissami aggersumi allaannerusussaapput. Naatsorsuutigineqassanngilarmi qanermut assiaqutit atorneqaleqqissasut imaluunniit inuit qanoq amerlatigisukkaat katersortinneqarnissaannik killilersuisoqaqqissasoq.
- Nalunngilarput tuniluuttoqalissagaluarpat tamanna unitsissinnaanatigu, taamaattumik ukioq kingulleq periusaasumiit allaanerusumik massakkut periuseqassaagut, aqqutissatuarpulli tassaavoq sisamassaanik akiuussusersuinissaq, nakorsaaneq oqarpoq.
Nittartagaq corona.nun.gl nutarsarneqassaaq sumiiffinnilu qassinut sumilu akiuussusersuisoqaleraangat tassuuna ilisimatitsisoqartassalluni. Nunaqarfiilli ilaanni, nunaqarfinnut tikittoqalersillugu aatsaat akiuussusersuisoqartassalluni.
