Sisimiuni ikuallattoqarnera: Louisep illumi sanilini itersarlugillu politiit sianerfigigai

Sisimiuni inissiami sapaatip akunnerata siuliani ikuallattoqarmat inuit marluk ajunaarput.

Ikuallattoq pivoq Kussangasoq 18-imi tallimanngornerup ullaassaani. Louise Jessen meeraalu marluk nipimit ullaakkut itertinneqarput.

- W.C-p anartarfiata boblerneranik taavalu issiavittaata qummoornerani ammoorneranilu, tassani itertitaavunga.

Taassuma taamaammat suna nipiliornersoq misissulerpaa.

- Chokkeqqangaatsiarama, taava isumaqaqqaaraluarpunga uagutsinni, taava tjekkereriarama uagutsinni, taamaappasinngeriarmat atiligut ... taava eqqarsalerpunga atiligunuku immaqa ikuallattut.

Aneriarluni eqqaamiutik kasuttoqattaarsimavai, ammaanneqaranili. Qitornani alakkaqqeriarlugit appassaanik kasuttoqattaaqqippoq sulilu ammaanneqarani. Meeqqani orneqqikkamigit ernerminut allamiittumut sianersimavoq aggeqqullugu.

- Tassani aperivaanga politiinut sianersimanersunga, aatsaat silattuaqivunga, aatsaallu ileriarlugu politiinut sianerlunga, Louise Jessen oqarpoq.

Politiit: Alianartumik pisoqartoq

Sisimiuni ikuallattoqarnera pissutigalugu immikkut ilisimasalinnik tikisitsisoqarpoq. Toqusut timaannik misissuisartoq ikuallattoqarneranilu misissuisartut ikuallattoqarnerata aqaguani tikipput, misissuinerillu arfininngornermi sapaammilu naammassineqarput, politikommissæri oqarpoq.

Ikuallattoqarnerani ajunaartut tassaapput arnaq 62-inik ukiulik angullu 58-inik ukiulik. Taakku qanigisaat kalerrinneqareerput.

- Misissuinerit qulakkeerpaat pinerliisoqarsimanngitsoq, kisianni tassa alianartumik pisoqarsimasoq, Karl Jørgen Lennert oqarpoq.

AAMMA ATUARUK Sisimiuni ikuallattoqartoq: Inuit marluk inissiami toqungasut nassaarineqartut

Misissuinermi paasisat tamakkiisumik oqaatiginngikkaluarlugit, ajunaartut suna toqqutigisimaneraat pillugu, politikommisæri nangippoq:

- Tassa pujoq annertooq iijorarsimavaat naajorarlugu, taamatut tassa ipisimapput. Taamatut oqaatigisariaqarpara, pinerliisoqarsimanngilarli.

Politikommisærip inuit angerlarsimaffimminni ikuallattoqarnissaannut kalerrisaaruteqarnissaat kaammattuutigaa.

- Taava tassa tamakkua nipitoorujussuarmik qoqernaannartumik itersaasuusinnaapput unnuami ikuallattoornermi. Taamatullu aamma alianartumik pisoqannginnissaanik kinguneqartitsisinnaallutik.

Louise meeraalu najugassaannik tunineqarallartut

Louise qitornanilu allamut inissikkallarneqarsimapput, sulilu naluaa angerlarsimaffimminni pigisamikkut qanoq annaasaqartigissanerlutik qaqugulu uteqqikkumaarnerlutik.

Taassumali sillimmasersimannginnertik uggoringaatsiarpaa.

- Forsikrinngeqannginnatta. Qaammatit marluk qaangiupput eqqartoqqissaarakku forsikringeqartariaqarpugut arlaat ajutuussagaluarpalluunniit akisunaarpallaassaqaarput, sunaaffami pisoqaliivissoq.

Ikuallaffimmut eqqaamiuusut ilaqutariit marluk allamut inissikkallarneqarsimapput, A/S Inissiaatileqatigiiffik INImilu Sullissinermut aqutsisoq Rachel Ingemann oqarpoq, init uterfigineqartinnagit inissiaqarfimmi ruujorit ajoquserneqarsimanersut misissorneqaqqaassasut.