Sisimiuni meeqqat ataasinngorpat atualissasut
Sisimiuni meeqqat atuarfianni atuartut aasaanerani atuanngiffiup kingorna, akunneq kingulleq atualeqqittussaagaluarput. Coronali pissutaalluni atualeqqinnissaq kinguartinneqarpoq, Sisimiunili atuarfiit ataasinngorpat ammaqqissapput.
Atuartunulli immikkut ittunik malittassaqartoq Namminersorlutik Oqartussat tuqgassiuutinut nalunaaruteqarlutik allapput.
Atuarfiit ammaaqqinniarneqarnerat angajoqqaarpassuarnit aarleqqutigineqarpoq. Ernumanissamulli tunngavissaqanngitsoq tusagassiuutinut nalunaarummi allassimavoq.
AAMMA ATUARUK Kalaalllit Nunaani coronamik tunillatsittut aatsaat taama amerlatigisut
Atualeqqinneq isumannaatsumik pisinnaavoq, tamannalu meeqqat ulluinnarnut uteqqinnissaannut pingaaruteqartoq nunatta nakorsaanerata Henrik L. Hansenip naqissuserpaa.
- Atuartut imminnut qanillinngippata tuniluunnissamut aarlerinartoqassanngilaq, Henrik L. Hansen oqarpoq.
- Meeqqalli atuarfiup avataani peqatigiippata, tamatumani tunillaassuuttoqarnissaanut aarlerinartoq atuarfimmisulli issaaq, imaluunnit suli aarlerinarnerulluni. Atuarfiup avataani pisunut tunillaassuunnermi misissuinissamut periarfissaqanngilagut, meeqqat sumiissimanersut ilisimassannginnatsigu, nakorsaaneq oqarpoq.
Nunatsinni nakorsaaneqarfik Qeqqata Kommunialu suleqatigiillutik malittarisassiorsimapput. Taakku qulakkiissavaat atuartut imminnut qanillinaveersaarnissaat, taamaalillutik sapinngisaq tamaat tuniluuttoqarnissaa pinaveersaarniarlugu.
Atuartut ilai angerlarsimaffimminni ilaalu atuarfinni atuartinneqassapput.
Tassa 1. klassimiit 5. klassimut atuartut atuarfinni atuartinneqassapput, 6. klassimiillu 10. klassimut atuartut angerlarsimafimminniit atuartinneqassallutik.
Atuartut nikerartunik atuariartortarfeqarlutillu anitsiartarfeqassapput.
Malittassani pingaarnerit ukuupput:
- 1.-5.klassit atuarfinni atuartinneqartassapput, 6.-10.klassillu angerlarsimaffimminniit atuartinneqartassallutik. Marlunngorpat 6.-10. klasse angerlarsimaffimminni atuartinneqarnissaannut ilitsersuutit nassiunneqassapput.
- Atuartut holdikkaarlutik atuariartortassapput. Taamaaliornermi atuartut atuartitsiviup iluaniittut ikilisarneqassapput.
- 1.-5. klasse ataasinngorpat 16. august atualissapput.
- 6.-10. klassit marlunngorpat 17. august atualissapput.
- Atuartut nikerartunik atuariartortarfeqarlunilu anitsiartarfeqassapput.
- Atuartut, inimi atuartitsivimmi ullup qeqqasiortassapput, tamatumani neriffiup nalaani atuartunut allanut akulerutinnginnissaq pinaveersaarniarlugu.
- Anitsiarfiit aalajangersimasumik aaqqinneqassapput, taamaalilluni atuartut atuaqatitik kisiisa anitsiaqatigisassallugit.
- Atuartut imminnut qanillinaveersaassapput, assatillu errortukulallugit
- Atuartut nualluummut ersiutillit angerlarsimaannassapput
Qeqqata Kommuniata malitarisassat nutaat Sisimiuni atuartuutilinnut paasissutissiissutigineqassasut tusagassiuutinut nalunaarummi ilanngullugu erseqqissaatigineqarpoq.
