Kalaalllit Nunaani coronamik tunillatsittut aatsaat taama amerlatigisut
Coronavirus Kalaallit Nunaanni tuniluutilermalli tunillatsissimasut maanna 100-it sinnerpaat.
Nakorsaaneqarfiup kisitsisaataanni nittartakkami nun.gl-imi nalunaaqutaq ataatsimut qiteqquttoq nalunaarsorneqartut naapertorlugit Kalaallit Nunaanni coronamik tunillatsissimasut 103-upput.
Qeqqata Kommuniani maanna tunillatsissimasut 74-upput, ippassaq 68-iusimallutik.
Nittartakkami nun.gl-imi allassimasut naapertorlugit Qeqqata Kommuniani napparsimmavimmi uninngasut suli marluupput.
Kommune Qeqertalimmi tunillatsissimasut ippassaq 15-iusinnarlutik ullumikkut qulingiluat tunillatsissimasutut nalunaarsorneqarput.
Kommuneqarfik Sermersuumi tunillatsissimasutut nalunaarsorneqarsimasut ippassaq 13-upput ullumikkullu 17-inngorsimallutik.
Kommune Kujallermi tunillatsissimasut ippassartulli pingasuupput.
Avannaata Kommuniani coronamik tunillatsissimasoqarneranik ullumikkut nalunaarsuisoqanngilaq.
Nakorsaaneqarfiup nittartagaannit kisitsisit:
Qeqqata Kommuniani tunillatsissimasut amerliartuinnavipput.
Peqqissutsimut Naalakkersuisoq Kirsten Fencker (N) tusagassiortunik marlunngornermi katersortitsinermi, fiistertoqannginnissamik nangikkiartoqartarnissamillu sakkortuumik kaammattuuteqarpoq, tuniluunnerit fiistattuni nangikkiaasunilu siaruaannerusarmata.
AAMMA ATUARUK Aatsaat taama amerlatigisut: 99-it tunillatsissimasut
Tamatuma kingunerisaanik Qeqqata Kommuniata borgmesteria Malik Berthelsenip (S) imigassanik aalakoornartortalinnik tuniniaanerup inerteqqutigilernissaanik Naalakkersuisunut qinnutigaa - qinnuteqaallu Naalakersuisunit akuerineqarpoq.
Sisimiuni nunaqarfiinilu, Sarfannguani Itillimilu, imigassamik tuniniaanerit matuneqarput, imigassamillu tuniniaanerit inerteqqutigineqarnerat ataasinngornerup tungaanut atuupput.
