Siumut Peqatigiiffik Illorsuarmiunut aningaasaliinissaraluamut: Akisussaaffik tiguneqartariaqarpoq
Akisussaaffik tiguneqartariaqartoq, aningaasallu matussuserneqartariaqartut partiip siulittaasua Erik Jensen isumaqarpoq. Taamaammat pisup aningaasaqarnermut ataatsimiititaliami ataatsimiissutigineqarnissaa piumasaraa.
- Atorfilittanut pisuutitsiniaaneq imaluunniit tikkuaaneq inissaminiinngilluinnarpoq. Naalakkersuisut sutigut tamatigut akisussaatinneqartarput suliamut tunngassuteqarpat. Paatsooqatigiittoqarsimappat soorunami naalakkersuisut aaqqitassarivaat, Erik Jensen oqarpoq.
Siumup folketingimi ilaasortaatitaata Aki-Matilda Høegh-Damip Peqatigiiffik Illorsuarmiunut to millionit koruuninik aningaasaliinissaq danskit aningaasanut inatsisaannut isumaqatiginninniarnermini iluatsikkaluarpaa.
Naalakkersuisulli itigartitsissutigaat.
AAMMA ATUARUK Illorsuarmiut naalakkersuisoq naammagittaalliutigigaat: Immikkoorsitsineruvoq
Paatsooqatigiittoqarnerani taama pisoqartoq aningaasaqarnermut naalakkersuisup Naaja Nathanielsenip (IA) KNR-imut siusinnerusukkut nassuiaatigaa.
Aningaasaqarnermut ataatsimiititaliami eqqartorneqassasoq
Aningaasat Illorsuit ammaqqinnissaannut atorneqassasut Naalakkersuisut isumaqarput. Illorsuillu tassaarsuaqaqqissappat aarlerinartorsiorfimmiimmat itigartitsipput.
Ministeriaqarfimmi atorfilik ima nassuiaateqarluni allappoq:
"Paasisakka naapertorlugit, Peqatigiiffik Illorsuarmiunut ukiuni tulliuttuni sisamani to millionit koruuninik aningaasaliisoqassasoq, Namminersorlutik oqartussat nunaqarfiup ammaqqikkiartuaarneqarnissaa siunertaralugu, siunnersuutigineqarput."
AAMMA ATUARUK Peqatigiiffik aningaasaliinissaraluamut: Paatsoortoqarnera pakatsinartorujussuuvoq
Naaja Nathanielsen taanna pillugu ima oqarpoq:
- Illorsuarni pisussanut aningaasaliisoqassasoq uagut paasivarput, tamannalu tapersersinnaasimanngilarput. Peqatigiiffimmut aningaasaliisoqarniarnera tapersersorusunnartorujussuuvoq, ilaasortanullu aaqqissuussinerit Illorsuarmi pisussaanngitsut ajoriffissaqartinngilavut. Tassa paatsoorneq aallavigalugu taamaattoqartoq ugguarnarpoq, Naaja Nathanielsen oqarpoq.
Paatsooqatigiinnermullu kikkut akisussaasuunersut oqaatigiuminaannerarpaa.
Kinali akisussaasuunersoq inissinneqartariaqartoq Siumup siulittaasua isumaqarpoq. Taamaammat aningaasaqarnermut ataatsimiititaliami ataatsimiissutigineqaqquaa.
- Akisussaaffik inisseriarlugu qanoq aaqqiiviginiarneqarnersoq paasisariaqaratsigu. Illorsuiarmiut pisariaqartitaat aammalu ikiorserneqarsinnaanissaannut tunngasut, to millionit koruunit taakkua annaasaat, matussuserniarneraat aamma paasilluarusukkatsigu Siumuminngaanniit, Erik Jensen oqarpoq.
