Siunnersuut pingajussaaneerneqassasoq: Utoqqalinersiat qaammammut 750 koruuninik amerlineqarsinnaassasut
Inatsisartut utoqqalinersiutit siusinaartumillu utoqqalinersiutit pillugit siunnersuut aqagu tallimanngornermi maajip ulluisa 27-anni oqaluuserissavaat.
Assersuutigalugu utoqqalinersiaqartup aningaasarsiaasa ukiumut 9000 koruuninik amerlineqarnissaat siunnersuutigineqarpoq, tassa qaammammut 750 koruuninik amerlineqarniarlutik. Aningaasarsiat amerlineqarnerat utoqqalinersialinnut kisimiittunut aappaariinnullu atuuttoq nalunaarutigineqarpoq.
- Nuannaarutissaraarput utoqqaat atugarisaat pitsanngorsaaffigisinnaagatsigit. Utoqqalinersiat amerlineqarnerat ineqarnermut tapiissutit ikinnerulersinneqarnissaannik kinguneqassasoq Naalakkersuisut sianiginngitsuunngilaat, Isumaginninnermut Sulisoqarnermullu naalakkersuisoq Jess Svane tusagassiutinut nalunaarummi ilaatigut oqarpoq.
Utoqqaat taakkununngalu soqutigisaqartut allat suleqatigalugit utoqqaat pillugit iliuusissatut pilersaarutip atuutilersinneratigut utoqqaat pillugit suliassat pingaartillugit naalakkersuisut ukiuni tulliuttuni suliaqarfigissammatigit naalakkersuisut erseqqissaatigaat.
