Sorsunnersuup aappaata kingorna siorna inunngortut aatsaat taama ikitsigipput

2021-mi inunngortut sorsunnersuup aappaata kingornali aatsaat taama ikitsigipput. Taamaakkaluartoq nunatsinni innuttaasut siornamut sanilliullugit amerlanerupput.

Allattoq Jaaku Lyberth, Ivik Kristiansen

februaarip 12-at 2022 14:21

Siorna nunatsinni inunngortut 761-upput. Sorsunnersuup aappaa kingorna aatsaat taama inunngortut ikitsigipput.

Kalaallit Nunaani Naatsorsueqqissaartarfik taama allappoq, kalaallit Nunaani innuttaasut amerlasussaannik naatsorsuinerit kingulliit saqqummiunneqarneranni

Siornaak ukioq 2020-mi Kalaallit Nunaanni 865-it inunngorput.

Arnat 20-30-nik ukiullit illoqarfiit anginerusut avataani najugaqartut 2021-mi siullermeerlutik meerartaarnissartik kinguartissimagaat takuneqarsinnaasoq Naatsorsueqqissaartarfik taama allappoq.

Taamaakkaluartoq innuttaasut amerleriarput.

2021-imi ukiortaami innuttaasut 56.421-upput, taava ukioq ataaseq qaangiummat tassalu 2022-mi 56.562-inngorlutik, tassalu ukiup ataatsip ingerlanerai 141-nik amerlillutik.

Inunngortut ikiligaluartut inuttaasut amerlanerulernerannut pissutaatinneqarpoq ukiuni kingullerni coronamik tuniluunneq.

Kalaallit Nunaannit avammut nuuttut aamma Kalaallit Nunaannut nuuttut amerlassusaannut taakkua sunniuteqarput.

Nunatsinnit nuuttut nunatsinnullu nuuttut nikingassutaat ukiuni 30-ni kisitsisit agguaqatigiissinnerinut naleqqiullugu minnerujussuuvoq.

Nutaarsiassami kukkunermik nassaarsimaguit uunga allaffigineqarsinnaavugut.