Suleqatigiisitsisut ingerlatseriaatsiminnik nutarterissasut
Tillie Martinussenip siulittaasunngornera Suleqatigiisitsisut ataatsimeersuarneranni kisimi sammineqanngilaq.
Aamma partiip naatsorsuutai, taakkualu qanoq atorneqartarsimaneri oqallisigineqarput.
Partiillu aningaasaataanik atuinissamut malittarisassat allanngortinneqarnialerput.
- Siulersuisuunerni ilaasortanngortut partiimi suleriusissaq iliuusissallu ilusilersornissaat tullinnguuppaat. Taakku piareerpata susoqarnersoq taavalu sooq taama pisoqarnersoq kikkut tamarmik paasisinnaassavaat, Kim Lyberth, siulersuisuunerni ilaasortaasoq ataatsimeersuareernermi oqarpoq.
AAMMA ATUARUK Suleqatigiisitsisut ataatsimeersuarnerat: Tillie siulittaasutut qinigaavoq
Partiimut tapiissutit qanoq atorneqartarneri pillugit oqallittoqartupilussuusoq taanna oqarpoq. Partiip aningaasaataanit atuisoqarniartillugu malittarisassat allanngortinneqassasut ilanngullugu oqaatigaa.
- Suli allannguisoqanngilaq. Siulersuisunili ilaasortaalersut ataatsimeersuarnermi siunnersuutigineqartut aallaavigalugit suliaqartussaapput, Kim Lyberth itisiliinani oqarpoq.
Suleqatigiisitsisut siulersuisuunerini ilaasortanngortut:
Siulittaasoq: Tillie Martinussen
Siulersuisuunerni ilaasortat: Tillie Martinussen, Kim Lyberth, Sofus Fenger Hove, Torben Ørting Jørgensen Cecilie Jakobsenilu.
Siulittaasup tullia siulersuisuunerit ataatsimeerngaarnerminni qinissavaat.
Suleqatigiisitsisut siulersuisuunerisa aningaasartuutit partiimut attuumassuteqarnersut suliamiit suliamut aalajangiiffigisarpaat. Aningaasartuutit partiimut iluaqutaanersut aallaavigalugit naliliiffigineqartartut Kim Lyberth KNR-imut novembarip qaammataani oqarpoq.
Siulersuisuunerni ilaasortanngortut ataatsimeeqqaarnissartik suli ullulinngilaat. Piffissarli qaninnerusoq tamanna pissasoq Kim Lyberth oqarpoq.
Partiimi avissaartuuttut
Partiip ataatsimeersuartitsinissaa sioqqullugu aningaasanik atueriuseq ilaasortanit avissaartuuffiuvoq. Oktobarimi avissaartuutilerput.
Partiimi ilaasortat tallimat Suleqatigiisitsisunit anisitaanerannik ilaatigut kinguneqartoq.
AAMMA ATUARUK Suleqatigiisitsisut ilaasortani tallimat ilaasortaajunnaarsikkai
Tillie Martinussenip nammineq aningaasartuutaanut partiip aningaasaatai atorneqartarsimasut - inuiaqatigiit akileraarutaanneersut - ilaasortat maanna anisitaasimalersut isornartorsiorpaat.
Ilaatigut Tillie Martinussenip inimut allamut nutsernera, 14.000 koruunit missiliorlugit aningaasartuuteqarfiusoq assersuutigalugu.
Tillie Martinussenilli partiillu siulersuisuunerisa aningaasartuutit partiimut attuumassuteqarnerarpaat.
Lyberth: Tamakkiisumik taperserneqarpugut
Taama naliliineq ataatsimeersuarnermi taperserneqartoq Kim Lyberth oqarpoq. Aappaagumullu missingersuutit aamma akuerineqarlutik.
- Iliuuserikuusagut ataatsimeersuarnermi tamakkiisumik taperserneqarput. Naatsorsuutit, missingersuutillu akuerineqarput. Maannalu siumut isigaluta ingerlaqqissaagut, Kim Lyberth oqarpoq.
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Partii 2018-imi pilersinneqarmalli ataatsimeersuarngaarneq tusagassiuutinit peqataaffigeqqusaanani matoqqasumik ingerlanneqarpoq.
Avataanit peqataaffigineqarsinnaanersoq ataasimeersuarnermi aalajangiiffigineqaqqaartariaqartoq, Kim Lyberth oqarpoq.
Siulittaasunngorlaaq Tillie Martinussen KNR-imit oqaaseqartinniarlugu attaviginiarsaraluarparput. Saaffiginnissutigulli suli akineqanngillat.
