Suleqatigiissitsisut inatsisinik malinninngillat: Naatsorsuutit kukkunersiukkat suli tunniutinngilaat
Qaammatisiutit takutippaat 2022-miittugut, kisainni Suleqatigiissitsisut suli 2020-mut ukiumoortumik naatsorsuutit kukkunersiorneqarsimasut suli tunniutinngilaat.
Inatsisartut siulittasoqarfiata tamanna siorna novembarimi uparuarpaa. Partiip siulersuisuinut allakkani Inatsisartunut siulittaasoq Hans Enoksen ima allappoq:
- Siulittaasoqarfiup sakkortunerpaamik partii Suleqatigiissitsisut kaamattorpai PIAARNERPAAMIK KINGUSINNERPAAMILLU DECEMBARIP ULLUISA 31-anni 2021 naatsorsuutit/naatsorsuutit kukkunersiorneqarsimasut nassiuteqqullugit.
Tamannali pinngilaq, aammalu naatsorsuutit kukkunersiorneqarsimasut inatsisit naapertorlugit siulittaasoqarfimmeereersimasussaagaluarput siorna juulip aallaqqaataani.
AAMMA ATUARUK Suleqatigiisitsisut ingerlatseriaatsiminnik nutarterissasut
Partiit pisortanit tapiissutinik pigaangata, soorlu Suleqatigiissitsisut taamaattut, tamanna piumasaqaataavoq.
Hans Enoksen allakkani Politikikkut sulinernut aningaasatigut tapiisarneq pillugu Inatsisartut inatsisaanni § 9, imm. 2-mut innersuussivoq, tassanilu allaqqavoq.
- Naatsorsuutit kukkunersiorneqarsimasut tunniunneqanngippata Inatsisartut Siulittasoqarfiata aalajangersinnaavaa tapiissutit tunniunneqartussat kinguartinneqarsinnaasut imaluunnit peerneqarsinnaasut.
Kisitsisaagallartut takutippaat annertoqisumik amigartooruteqartoq
Inatsisartut nittartagaanni partiip ukiumoortumik naatsorsuutai kukkunersiorneqanngitsut saqqummiunneqaqqammerput. Tamanna imaappoq naatsorsuutit naatsorsuuserisumit pisortanit akuerisamit kisitsisit ilumoortuunerinik uppernarsaasinnaasumit takuneqarsimanngitsut.
Kisitsini allasimasuni takuneqarsinnaavoq qajassuartumik oqaatigalugu partii aningaasaqarnikkut ajornartorsioqisoq. 150.000 koruunit missaanniittunik amigartooruteqartoq 2020-mi inerneqarpoq.
AAMMA ATUARUK Eqqartuussiviup Tillie Martinussenimut inerteqquteqartitsiniarneq itigartitsissutigigaa
Ilutigalugu partii nalinginnaasuunngilluinaartumik nammineq aningaasaateqarpoq minus 268.756 koruuninik.
Partiip nammineq kisitsisaannit saqqummerpoq pisortanit 2020-mi 1,16 millionit koruunit tunniunneqarsimasut. Partiip katillugit isertitaannit taamallaat 7.250 koruunit ilaasortaanermut akiliutaapput.
Naatsorsuuserisoq akilissallugu akissaqanngitsut
Inatsisartut siulittaasoqarfiannut akissummit takuneqarsinnaavoq partiip aningaasaqarnera tamakkiisumik nakkutigneqarsimanngitsoq.
Partii naatsorsuutinik kukkunersiukkanik tunniussisinnaasimanngilaq aningaasaateqannginnamik taamalu naatsorsuuserisumut akissaqarnatik.
Akissummi siulersuisut partiip siusinnerusukkut naatsorsuutinut akisussaasua pisuutippaat aamma innersuussutigalugu partii politiinut nalunaarutigineqarsimammat partiinut tapiissutinik atornerluisimasutut.
AAMMA ATUARUK Suleqatigiissitsisuni upernaaq eqqissiviilliortoqareersoq: Partiimi nukiit politikkimut maanna atorneqassapput
Ukiumoortumik naatsorsuutit suliarineqarnerannut immikkut ittumik aningaasartuuteqartitsivoq, partii nalunaarpoq:
- Allatut oqaatigalugu 2020-mut naatsorsuutinik kukkunersiorneqarsimasunik tigusinissamut ukioq manna naatinnagu Inatsisartut piumasaqaataat eqqortissinnanngilarput.
- Massakkut atuuttut tunngavigalugit qinnuteqaatigissavarput piffisarititaasoq EY-p naatsorsuutinik naammassinninnissaanut aamma kukkunersiornerup naammassinisaanut kinguartinneqassasoq, partii Inatsisartut siulittaasoqarfiannut allappoq.
Kisianni saqqummerpoq, Partii Suleqatigiissitsisut massakkut aningaasanik kingullernik pissarsimasut 2020-mut naatsorsuutit kukkunersiorneqarnissaannut atugassanik, naatsorsuutigigaallu Inatsisartut siulittaasoqarfiannut ukioq manna kvartalimi siullemi tunniutissallugit.
