Taamaammat umimmaap piaraa Kangerlussuarmi toquvoq
Umimmaaraq napparsimanngilaq. Aamma aallaaneqanngilaq. Umimmaaraq anaanaqanngitsoq Kangerlussuarmi qaammatini pingasuni angalaarujoorsimasoq nukissaarulluni toquvoq.
Piniarnermut Naalakkersuisoqarfik tusagassiuutinut nalunaaruteqarpoq.
Naalakkersuisoqarfik naapertorlugu umimmaaraq ajoquserneqanngilaq – taassumali “silap allanngornera nerisassaaleqininilu” nukissaarussutigisimassagai, taamaalillunilu toqusimassasoq nalilerneqarpoq.
Umimmaap piaraa februaarip aqqarnani toquvoq.
Umimmaaraq misiliisaraluarluni nikuissinnaanngitsoq ullaakkut takuneqarpoq. Taamaammat Kangerlussuarmi piniarnermut aalisarnermullu nakkutilliisut attavigineqarput. Taakku nakkutiginnilerput, aqaguanilu ullaakkut uummaarippasissutut nalilerpaat.
Salullunilu sanngiitsoq
Naalakkersuisoqarfiup oqarnera naapertorlugu piniarnermut aalisarnermullu nakkutilliisut umimmaap piaraa ikiorniarlugu Uumasunut Nakorsaqarfik Inuussutissanullu Oqartussaaffik attaveqarfigigaluarpaa. Umimmaararli sanngiippallaarpoq.
Umimmaap piaraa 2022-mi ukiukkut piaqqiarineqarsimassangatinneqarpoq.
Umimmaap piaraa arfininngorneq februaarip 18-ianni misissorneqarpoq. Tusagassiuutinut nalunaarut naapertorlugu umimmaap piaraa saluttuararsuullunilu sanngiippoq, kigutinilu immuttuutit tamaasa atorlugillu nassui 1 centimeterit missaanniipput.
Umimmaap piaraa inuit ilaannit “Musku”-mik taagorneqarpoq. Musku Danmarkimi uumasuusivimmit perusunneqartoq tusatsiarneqarpoq – tamannali Aalisarnermut Piniarnermullu Naalakkersuisoqarfiup uppernarsarusunngilaa.
Naalakkersuisoqarfiulli uumasunik nunatsinnit nassiussinermut malittarisassat misissorai KNR-imut siusinnerusukkut paasissutissiissutigaa.
Oqaasertaliisorpassuusut
Kommunimi sulisut hiistit nerisassaannik umimmaap piaraanut nerisitsipput, umimmaaraq taamaalilluni vitamininik pissarsisinnaaniassammat, uumasullu nakorsaata akiuussuserlugu.
Tamanna innuttaasut assigiinngitsunik KNR-ip Facebookimi quppernerani oqaasertaliinerannik kinguneqarpoq, innuttaasut ilaasa piaraq toqunneqassasoq, ovnikkullu siariarlugu naatsiialerlugu mamaqisoq, allappoq.
Innuttaasut ilaasa takornariat Kangerlussuarmut takornariagassaattut Kangerlussuarmiitinneqaannassasoq kissaatigaat - kiattunukaannagulu nillertumiitinneqassasoq.
"Danmarki kiappallaarpoq, uumasuusivimmut uumasut inaannut mattunneqarnissaa peqqinnanngilaq. Umimmaqataasa akornaniitiinnarli" ataaseq allappoq.
"Naamik, naamik! Nunani kiattumiissiaanngilluinnarpoq, nillertumiissiaruna! Sooruna dk-mut nuutsinneqassasoq!? ilaqutaqarpoq! kisimiinngilaq" alla allappoq.
