Tarnip pissusaanik ilisimasalik: Qallunaat misissueriaasiat kalaallinut angajoqqaanut eqqunngitsumik naliliinermik kinguneqartitsisinnaasoq
Danmarkimi kalaallit meeqqat angajoqqaaviniit allamut inissinneqarnissaannik sulianik VIVE-p misissuinera saqqummiunneqaqqammerpoq. Kulturikkut assigiinngissutsit angerlarsimaffiup avataanut kukkusumik inissiisarnernik ilaatigut kinguneqartarsimasut, naliliinerit ilagivaat.
Danmarkimilu angajoqqaanik misissueriaaseq kalaallit inooriaasiannik kulturiannillu eqqumaffiginniffiunngitsoq, kalaaleq tarnip pissusaannik ilisimasalik Karen Marie Nathansen oqarpoq.
Danmarkimi angajoqqaajusinnaanermik misissuisarneq angajoqqaatut qanoq ittuunermik, qanoq inuttut pissuseqarnermik, poqissutsimillu misissuinermik imaqartartoq, Karen Marie Nathansen oqarpoq.
Karen Marie Nathansenip kalaallit qallunaallu akornanni kiinarsorluni ussersornerit assigiinngissuteqartut ilaatigut taavaa.
Assersuutigalugu kalaalerpassuit angerniaraangamik qallutik qummoortarpaat, kisiannili qallunaanit paatsoorneqarsinnaalluni qallunaatut tupigutsannermik isumaqartinneqartarmat.
Kalaallit kulturiata allaanerunera qallunaamit tarnip pissusaannik ilisimasalimmit eqqumaffigineqartariaqarpoq
Kalaallit meeqqat Danmarkimi allamut inissinneqarsimasut pillugit nalunaarusiaq
Misissuineq danskit 2021-mut aningaasanut inatsisaannit aningaasaliiffigineqaproq.
Kalaallit meeqqat Danmarkimi najugaqartut 5,6 procentii angerlarsimaffiup avataanut inissinneqarsimasut nalunaarusiaq takutippaa.
Danskit meerartaannut tamanut sanilliukkaanni danskit meeqqat 1 procentiinnaat angerlarsimaffiup avataanut inissinneqarsimapput.
Danskit suliamik isumaginnittut kalaallillu ilaqutariit akornanni suleqatigiinneq uku pissutigalugit unammillernartoq ilaatigut inerniliutigineqarpoq:
- Kalaallit angajoqqaat danskisut piginnaasakinnerat
- Oqalutsissaaleqineq
- Danskit suliamik isumaginnittut kalaallit kulturianik ilisimasaqannginnerat
- Kalaallit ilaqutariit aamma danskit suliamik ilisimannittut pillugit isummat pigiliutiinnakkat
- Angajoqqaanik misissuissutit kalaallisuunnginnerat
Misissuineq 2014-imi, 2016-imi, 2018-imi aamma 2020-mi meeqqat 11-nit 17-inut ukiullit angerlarsimaffiup avataanut inissinneqarsimasut apersorneqarneri aamma kalaallit ilaqutariit angerlarsimaffiup avataanut inissinneqarsimasumik ikinnerpaamik ataatsimik meerartallit pillugit misissuineq atorlugit ilaatigut ingerlanneqarpoq.
Taamaammat misissuinermi periaatsit atorsinnaasut, ilisimasalik naliliivoq. Kisianni misissueriaaseq taanna atorlugu misissuinermi eqqumaffigisassaqartoq, taanna erseqqissaavoq.
- Una qujanartorujussuuvoq. Uuttuutit ajunngikkaluarlutik kisianni aamma eqqumaffigisassagut taakkuummata kulturit assigiinngitsut marluk aporaaffianni imatut inerneqassanngimmat illit poqiitsuusutit. Una anguniarneqartussaagami illit ineriartorfissatit suuppat? Taavalu aamma nukissatit sumiippat? Taamaalillutik ikiorsiissutissat ilinnut tuttussat pitsaanerpaaffissaminiittussaagamik.
Tassami kalaallinik angajoqqaanik misissuinermi taakkua immikkut kultureqarnerat inooriaaseqarnerallu eqqumaffigisariaqarpoq.
- Eqqumaffigisariaqarpaa una apersukkani kinaanersoq, suminngaanniit aggerfeqarpa? Kulturia paasinikuuara? Inooriaasia paasereernikuuara qanoq ittuusoq? Karen Marie Nathansen taama oqarpoq.
Misissorneqartut tarnip pissusaanik ilisimasalimmit kalaallimit misissorneqarnissartik kissaatigisinnaavaat
Taamaammat oqartussat kalaallit angajoqqaat Danmarkimi najugaqartut angajoqqaatut piukkunnassusiannik misissuissatillutik, kalaallinik tarnip pissusianik immikkut ilisimasalinnik ikiorteqartarnissaat pisariaqartoq, taanna oqarpoq.
AAMMA ATUARUK Angajoqqaat nuanniilliortut ilimagisaat taperserneqartut: Kalaaliugatta aporfeqarneruvugut
- Pingaaruteqartorujussuuvoq angajoqqaat kalaallit Qallunaat Nunaanni najugallit aperineqarnissaat kalaallisut oqaasilimmik psykologimik apersorneqarusuppat? misissorneqarusuppat? Taanna periarfissaagami. Karen Marie Nathansen oqarpoq.
VIVE-p nalunaarusiaani inerniliunneqarpoq kalaallit angajoqqaat arlallit misigisaraat suliamik isumaginnittup kalaallit ilaqutareeriaasiat perorsaariaasiallu paasisimasaqarfigisanngikkaat. VIVE-mi misissueqqissaarnermi pisortaq Karen Margrethe Dahl nassuiaavoq.
- Angajoqqaat paasinerlunneqartutut angajoqqaajunerminnillu isorineqartutut ilaatigut misigisimasarput, Karen Margrethe Dahl oqarpoq.
Danmarikimi kalaaliaqqat oqaatsitigut kulturikkullu assigiinngissuteqarneq pissutaalluni angerlarsimaffiup avataanut inissinneqartarsimasinnaasut, Karen Margrethe Dahl aamma oqarpoq.
