Tartupaluk: Demokraatit Atassutillu taperseraat Naleqqap isumaqatigiissut takoqqaarusukkaa
Naalakkersuisut siulittaasuat Muté B. Egede, danskillu nunanut allanut ministeriat Jeppe Kofed Canadamiullu nunanut allanut ministeriat Mélanie Joly oqaluttuarisaanermi killeqarfimmik marlunngormat atsioqatigiipput, tassalu imaappoq; naalagaaffiit marluk qeqertaq qunneratigut avillugu nunamittut pigilerpaat. Taannalu qeqertaq nunatta Canadallu qeqqaniittoq ukiuni 50-ni namminneq pigerusullugu assortuussutigaat.
Inatsisartuni illuatungiliuttut Naleraq, Demokraatit Atassullu tamanna qanoq isumaqarfigineraat KNR-miit aperaagut.
Naleqqamiit politikkikkut nunat allat pillugit oqaaseqartartoq Pele Broberg oqarpoq, tamatuma isummerfiginnginnerani isumaqatigiissutip imaa takoqqaarusukkitsik:
- Tunngaviatigut kinaassutitsinnut aalajangeerusunnikuunatik inissisimatitsinerat akunnattuunganartipparput, taamaammat qanoq siunissami pisoqassanersoq pissanganarpoq sulimi takunngilarput inatsisinut tungasortai qanoq isumaqatigiissimanersut. Tunngaviatigulli Naleqqamiit ujartugarput tassaavoq sakkulersorfiunngitsumik isumaqatigiinniartarnissaq, aammali ataqqeqqunarpoq uagut isumaqatigineqannginnerput, Pele Broberg KNR-mut oqarpoq, nangillunilu:
- Neriuutigaarput isumaqatigiissutip pissaanermut pingasoqiusamut aggulunneqarnera ilutigalugu Naalakkersuisut tunuliaquttatik, tassa Inatsisartut qanoq pisoqarsimanera pillugu paasititsiumaartut. Uagummi Naalakkersuisut aqutassarinngilagut nakkutigisussaavagulli. Naatsorsuutigaarput isumaqatigiissut saqqummiutissagaat, imaalu pillugu paasisaqarneroriarutta kingusinnerusukkut immaqa oqaaseqaqqissinnaajumaarpugut, Pele Broberg oqarpoq.
Partiit talerperliit ilorrisimaartut
Demokraatit isumaqatigiissut iluarisimaaraat, partiimi siulittaasup Jens-Frederik Nielsenip oqaatigaa:
- Nammineq naalakkersuisooqataanitta nalaani taannarpiaq annertuumik suliaqarfigaarput, inaarsaleruttorlutigulu naalakkersuisuniit aninikuulluta. Taamaammat nuannaarutigaarput, ukiorpassuarni saqitsaassutaasoq maannakkut oqaluttuaannanngormat maannalu tassa siumut isigisinnaanngorpugut, Jens-Frederik Nielsen KNR-mut oqarpoq.
- Aatsitassanut tunngasut allatigullu inuussutissarsiutitigut iluaqutaasinnaasut kikkunnit pigineqarnersut siusinnerusukkut ilisimaneqanngilaq killissaalu ilisimaneqarani. Maanna erseqqissivoq taamaalillunilu patajaannerusumik ingerlariaqqittoqarsinnaalerpoq, Jens-Frederik Nielsen oqarpoq.
Atassut aamma isumaqatigiissummik iluarisimaarinnippoq:
- Qeqartaq tamaat kisermaattuugutsigu pitsaanerusimassagaluarpoq naapeqatigiittoqarnerali ataatsimut isigalugu ajorinngilarput, Atassutip siulittaasua Aqqaluk Jeremiassen oqarpoq, nangillunilu:
- Ukiut tamaasa Tartupaluk erfalasuleriartorneqartarnikuuvoq, maannalu taanna atuukkunnaarpoq, killeqarfiliinerlu iluaqutaasussaassaaq aalisarfiit piniarfiillu eqqarsaatigissagaanni, maanna killeqarfiit sumiinneri naluneerupput.
