Tasiilami siorna eqqissiviilliortoqartoq - ukioq manna taamaanngilaq

Marlunngormat pingasunngormallu qaammammusisoqaannanngilaq. Akileraaruteqarpallaarsimasummi aamma utertoorrapput. Taamaammat nunatsinni sumiiffiit amerlanerpaartaanni politiit ulappupput.

Tasiilamili politiit ulapaanngillat. Siornali taamaalinerani imminut toquttut marluk, imminut toqunnissamik siorasaarisut sisamat, pinngitsaaliilluni atoqateqarneq, suliat nakuusernermut tunngasut arfinillit angerlarsimaffimmilu eqqissiviilliornerit 15-it ulapputigaat.

Tasiilamilu pisiniarfiit imerniartarfiillu imigassat siorna septembarip pingajuaniit 17-iat ilanngullugu matuneqarneranni aamma imigassaarniaqqusaajunnaarput.

Ullunili makkunani ulaarsimanatik, Tasiilami politeeqarfimmi aqutsisuugallartoq Allan Lægteskov KNR-imut oqarpoq.

- Akileraarutinit utertoortoqarrannerani pinartunik suliaqanngilagut. Pinartoqanngilaq, taanna oqarpoq.

AAMMA ATUARUK Tasiilami siorna eqqissiviilliortoqarpoq - ukiormanna taamaattoqaqqissanngilaq

- Eqqissilluta sulinerput malugusuutigaarput, Allan Lægteskov oqarpoq.

Kommuneqarfik Sermersuup Tasiilami immikkoortortaqarfia Tasiilami innuttaasunut pinaveersaartitsilluni ulluni makkunani pikialaartitsivoq.

- Sammisassat meeqqat atuareerneranni aallartittarput unnuallu tungaanut pisarlutik. Aaqqissuussarpaaluit ataatsikkut pisarmata innuttaasut soqutigisaminnut namminneerlutik ornigutiinnartassapput.

Tasiilami susassaqartitsinerit timersortarfimmi, katersortarfimmi, inuusuttut illuanni, fritidsklubbemi silamilu pisarput. Timersortarfimmi inuusuttunut inersimasunullu timersuutinik unammisitsinerit, katersortarfimmi meeqqanut filmertitsinerit, playstationertitsinerit aaqqissuussinerillu allat illoqarfiup qeqqani pipput.

- Politiit inuusuttut isersimaartarfianni aamma nereqatiserineqarput inuusuttullu kaagiliornermik tamatuma kingorna aamma unammipput, Arkalo Skifte oqarpoq.

Aaqqissuussinerpaaluit assigiinngitsut ippassaq pingasunngornermi aallartittut arfininngornerup unnuaa ilanngullugu pissapput.