Tasiilami toqutsineq: Toqutaasoq maanna kinaassusersineqartoq
Toqutaasoq ataasinngornerup marlunngornerullu unnuaani nassaarineqarpoq, politiilli angut pingasunngornermi aatsaat kinaassusersisinnaasimavaat.
- Toqutaasoq tassaavoq angut Tasiilameersoq 30-t 40-llu akornanni ukiulik, Malik Sandgreen, politiit misissuisartut ittuat oqarpoq.
Tasiilaq 2000-t ataatilaarlugit innuttaqarmat toqutaasup politiinit kinaassusersinissaata sivisunera inunnit tupigusuutigineqarpoq.
Kalaallit Nunaannili Politiit toqutsiffiusimasumi suli misissuimmata toqutaasup kinaassusersinissaata sooq taama sivisutigisimanersoq oqaatigisinnaanngilaat.
Politiit: Tasiilami innuttaasut ernumassutissaqanngillat
Politiit angummik tigusarinnereerput, toqutsisimasutullu pasineqarluni maanna tigummigallagaalluni. Angutip tigusarineqartup toqutsisimasutut pasineqarluni ulluni 28-ni tigummigallagaanissaa eqqartuussiviup aalajangerpaa, toqutsinermut atatillugu misissuisoqarnerata nalaani tigummigallagaassalluni.
- Misissugassarpassuaqarpugut, paasiniagassarpassuaqarlutalu, sulilu apersugassaqarlutalu, toqutsinermut pissutaasut pillugu itinerusumik tamanna pillugu oqaaseqarsinnaanngilagut, Malik Sandgreen oqarpoq.
AAMMA ATUARUK Tasiilami toqutsisoqarnerani suliaq: Pasineqartoq ulluni 28-ni tigummigallarneqassasoq
Toqutsisoqarneranut atatillugu misissuinerit takutippaat tigusarineqartup saniatigut inummik allamik pasisaqartoqanngitsoq, Tasiilamilu innuttaasut tamanna pillugu ernumassutissaqanngitsut misissueqqissaartartut aqutsisuat oqarpoq:
- Misissuinerit maannamut takutippaat innuttaasut allamik ernumassutissaqanngitsut, Malik Sandgreen, Kalaallit Nunaanni Politiineersoq, oqarpoq, innuttaasullu toqutsinermut tunngasunik paasissutissaateqartut saaffiginnillattaasut oqaatigalugu:
Politiit toqutsisoqarneranut atatillugu misissuinerminni sumiiffimmi pineqartumi suli assersuipput.
Tamatuma saniatigut Danmarkimi misissueqqissaartartut aamma attavigineqarsimapput.
Tasiilami toqutsisoqarnerani suliaq nunatsinni ukioq manna toqutsinerit tallimassaraat.
