Tasiilami toqutsisoqarnerani suliaq: Pasineqartoq ulluni 28-ni tigummigallarneqassasoq
Angut Tasiilami kinaaneranik ilisimaneqanngitsumik toqutsisimasutut pasineqartoq ulluni 28-ni tigummigallarneqarallassaaq.
Tamanna pasineqartup eqqartuussivimmi matoqqasumik marlunngornermi ualikkut sassartinneqarnerani eqqartuussiviup aalajangeraa, Kalaallit Nunaanni Politiit tusagassiuutinut nalunaarummi allapput.
AAMMA ATUARUK Politiit Tasiilami toqutsineq pillugu: Toqutaasoq angutaavoq aqqali naluarput
Unnerluutigineqartoq Naasuliartarpimmumi sumiiffiit ilaanni toqungasumik nassaartoqareersorlu ataasinngornerup unnuaani tigusarineqarpoq.
Kinaanera ilisimaneqanngitsoq
Toqungasulli kinaanera suli uppernarsarneqanngilaq, taamaammat misissueqqissaartut aqutsisuata, Malik Sandgreenip innuttaasut suliamut atatillugu paasissutissaateqarunik politiinut attaveqarnissaannik kaammatuuteqarfigai.
- Pisumut tunngatillugu paasissutissaateqaruit tamanna tusarusoqaarput, taanna ippassaq taama oqarpoq.
AAMMA ATUARUK Tasiilami angut toqungasoq nassaarineqarpoq: Toqutsisutut pasisaq tigusarineqarpoq
Toqungasumik nassaarfiusup nalaani misissueqqissaartoqarnera pissutigalugu aqqusineq assersorneqarsimavoq.
Tamatuma saniatigut Danmarkimi misissueqqissaartartut attavigineqarput.
Tasiilami toqutsisoqarnerani suliaq nunatsinni ukioq manna toqutsinerit tallimassaraat.
