Ukrainemiut 10 millionit missaat innaallagissamik pilersorneqanngitsut

Ukrainemiut 10 millionit missaat innaallagissamik pilersorneqanngillat.

Ukrainep præsidentia, Volodymyr Zelenskyj, ippassaq sisamanngornermi unnukkut oqalugiarami taama oqarpoq.

Nutaarsiassaqartitsivik BBC taama allappoq.

AAMMA ATUARUK Zelenskyj G20-t siuttuinut: Ukrainemi sorsunneq unitsinneqartariaqarpoq

Ukrainemi nunap atortulersugaanera ulluni kingullerni saassunneqartareersullu taama nalunaaruteqartoqarpoq:

- Innaallagissamik pilersuinerup nalinginnaasumik ingerlaqqilernissaa ulapputigaarput, præsidenti oqarpoq.

Gassiliorfik missililiorfillu russit saassussisarnerini kingullerni eqqorneqartunut ilaapput. Atorfilittat taama ilisimatitsisut, BBC allappoq.

Russit missilit timmisartuaqqallu ungasianiit aqunneqarsinnaasut ippassaq sisamanngornermi saassussinermi ilaatigut atorpaat.

AAMMA ATUARUK Ukrainemiut erfalasui amerlasuut russit sakkutuuisa Khersonimit tunuarterneranni amuneqartut

Ukrainep illoqarfiisa pingaarnersaat Kyiv Ukrainep avannaaniittuusoq, Ukrainep qiterpasissuani illoqarfik Dnipro kujasissuanilu illoqarfik Odesa saassunneqartunut ilaapput. Ukrainemi illersornissaqarfik taama ilisimatitsisoq, nutaarsiassaqartitsivik Reuters allappoq.

Ukrainep kangisissuani nunap immikkoortuani Donetskimi sakkuaattoqangaatsiartoqartuarsinnarpoq.

Ukrainemi qaammatini kingullerni qulingiluani sorsuttoqarnerani nunap immikkoortuani Donetskimi sakkuaannerit sakkortunerpaasimapput.