Tillinniaq pinerliortoq imminut parnaaruttoq
Politiit tallimanngornerup unnuaani pasinartumik kasuttorpaluttumik nipiliortoqarnera pissutigalugu Nuussuarmut ornigutsinneqarput.
Politiit tillinniarniartutut pasineqartut quimi parnaarussaaqqasoq nassaaraat.
Allattoq Tobias Malte Kristensen
decembarip 23-at 2022 14:49
Angut 20-t sinnerlugit ukiulik quimut imminut parnaaruttoornermi kingorna tallimanngornerup unnuaani tigusarineqarpoq.
Nuussuarmi matumut kasuttorpaluttoqarnera pillugu politiit unnuami marluk qeqqanut nalunaarfigineqartut, pigaartut pisortaata KNR-imut paasissutissiissutigaa.
Politiit sumiiffimmut ornigukkamik nipi quiminngaanneersoq nassaaraat, quimilu angut kasuttorujoortoq nassaaraat, taannalu tigusarineqarluni politeeqarfiliaanneqarpoq.
Angut tillinniarniarluni quimut isersimasoq imminulli parnaaruttoorsimasoq politiit inerniliissutigaat.
Angut tallimanngornermi ualikkut aqqanermut iperagaavoq, tillinniarniarsimasutulli suli pasineqarluni.
