Tintin arpakkiarniarluni Danmarkimiit billetsisivoq, arpannissarli taamaatiinnarneqarpoq
Nuummiit Kapisilinnut aasaanerani arpalluni unammisitsisarneq 2013-imiilli ingerlanneqartartoq, aaqqissuisut toqqinik, anartarfimmut atortunik sillimaniarnermullu atortut amigaatigileramikkit taamaatiinnarpaat.
Ukiunik kingullernik sisamanik arpaqataasarsimasoq, Danmarkimi najugalik qilanaarsimagaluaqaaq taannami marsimili billetsisereersimagaluarpoq.
- Nuukkap Extreme Running Racemut peqataaniarlunga Danmarkimiit billetsisereeraluarpunga, uggornaqaaq, nakorsaq Københavnimi najugalik, Tintin Svensson KNR-imut oqarpoq.
AAMMA ATUARUK Nuummit Kapisilinnut arpartitsisoqarnianngitsoq
Nuukkap Extreme Running Race ulluni pingasunik arpallugu ingerlanneqartarpoq, unnuiffissaq siulleq Kangerluarsunnguup qinnguaniippoq Camp 1-imik taaneqartartoq, ullup tullia Qooqquni Camp 2-mik taaneqartartoq apuuffissarlu Kapisillit Camp 3-ulluni.
- Pinngortitami arpanneq nuannareqaara, aqqutaa nuanneqigami. Inuillu peqataasartut ilakkuminartaqaat, aaqqissuussaq taanna nuannareqaara, Tintin Svensson oqarpoq.
Siorna arpaqataarngaartoq Mika Lyberth isumaqataavoq.
- Siorna siullerpaamik peqataavunga, peqataaqqaarama ingerlaannaq aqaguanili pilersaarutigilerpara ukioq manna arpannissamut toqqaannaq peqataaniarlunga.
- Peqataaqqaarama nuannersuaarpoq, tungaanut pissangarsuaarnikuullunga. Aqqutaani kammattaartorluta, ilisimalikkat amerlasuut, saniatigut nunarput ilikkarnerullugu takulluarnerullugu. Pinngortitamiilluta qaqqarsuit akornisigut, sermersuakkullu misigisaq annertuvoq nuannersoq.
Nuukkap Extreme Running Race Godthåbhallenip 2013-imi taamani pisortaa aaqqiissuusaanik ingerlanneqartalerpoq. Timersortarfiullu pigisaanik atortunik atortarlutik. Ukiorli manna pisortaq soraarami arpaat taanna nammineerussaminnik ernerata Qooqu Chemnitz Berthelsenip akisussaaffigilerpaa.
Atortussallu naqqaniit namminneq pisiariortortussanngorlugit.
- Paasiuminaatsilaarpara uggorinermik. Paasiuminaatsilaarpara aaqqissuussaq taama annertutigisoq, aamma aaqqissuisut nalunngilaat qanoq annertutigisoq, inuillu qanoq amerlatigisut uani pineqarnersut, taamaammat taamatut pisoqariataarnera eqqarsarnartoqartippara paasiuminaatsillugulu, Mika Lyberth oqarpoq.
Mika Lyberth aappanilu aasaanerani sulinngiffeqarnissartik angalanissartillu Nuukkap Extreme Running Racemut ukiarli naleqqussarlugu pilersaarusiornikuuaat. Taamaammallu taamaatiinnarneqarnera uggoralugu.
Mika Lyberth 32-nik ukiulik, Nuukkap Extreme Running Racemut siorna arpaqataarngaarpoq. Assi: Sara Maritta Brasse
- Assorujussuaq uggornarpoq, nalunnginnakku uangaannaanngitsoq aamma inuppassuit maani Nuummi nunaqqaterpassuagut, sinerissamiit aamma nunatta avataaneersut taanna pillugu maannga billetsisereerlutik pilersaarusioreeraluartut, taamaammat uggornarujussuarpoq, Mika Lyberth oqarpoq.
- Neriuppunga aaqqiissuteqartoqarumaartoq, siunissami taamaaleqqittoqannginniassammat. Inuppassuarnik una nuannersorujussuarmik kinguneqartitsisarami.
Nuukkap Extreme Running Race aallarteqqaarmat inuit 30-t peqataapput, ukiulli ingerlanerini peqataasartut amerliartuinnavillutik, siorna peqataasut 130-iupput.
Unammisitsineq Nuukkap Adventure Racemik taaguuteqalissaaq.
