Tivoli Friheden pingasunngorpat nipaatsumik ammaqqissasoq

Tivoli Frihedenip matuni takuniaaniartunut pingasunngorpat ualikkut ammaqqissavai.

Ammaqqinnerali niviarsiaqqap 14-inik ukiullip nuannaarniartarfimmi ajunaarneranik kinguneqartumik sapaatip akunnerata siuliani ajutoortoqarneranut tunngassuteqassaaq.

Tivoli Friheden nittartakkamini taama allappoq.

Nuannaarniartarfik niviarsiaqqap 14-inik ukiullip rutsjebaneani Cobrami ajutoortoqarneratigut ajunaarneranili matoqqalerpoq.

Tivoli Friheden pingasunngornermi nalunaaqutaq 14.00-imit 18.00-imut ammaqqissaaq. Tamannali nuannaarniartarfiup nammineq nassuiaaneratut ”nipaatsuussaaq”.

- Nuannaarniutit qaminngassapput. Neriniartarfiit matoqqassapput. Højtalerillu nipaqassanatik.

AAMMA ATUARUK Tivoli Friheden siusinnerpaamik marlunngorpat ammaqqissaaq - sulili killilersuisoqassaaq

- Tivoli Frihedenili pisuttuarusuttunut, issiaalaarusuttunut imaluunniit sulisutsinnik oqaloqateqarusuttunut tamanut ammassaaq.

Tivoli Friheden pingasunngornermi akeqanngitsumik iserfineqarsinnaassaaq. Rutshebanep Cobrap eqqaani naneruusersuiffiusumi naasortaliinissaq aamma periarfissaassaaq.

Tivoli Friheden sisamanngorpamit nalinginnaasumik ammaleqqissaaq.

Rusjebanemi ajutoorneq ilaasarfiata kingulliup attaviata napineratigut pivoq. 2008-imi assingusumik aamma ajutoortoqarnikuuvoq, tassani inuit sisamat ajoquserput.

Tivoli Frihedenimi pisortap, Henrik Ragborg Olesenip rutsjebane ajutoortoqannginnerani misilittarneqarlunilu akuerineqareersimasoq siusinnerusukkut oqaatigaa.

Rutsjebaneli ammaqqinneqassanngilaq.

Ajutoortoqarnera suna pissutaanersoq suli ilisimaneqanngilaq. Østjyllandip politivii tamatumani paasisaqarniarlutik suliaqarput.

Tivoli Frihedenip misissuinerit ”qaammatinik arlalinnik” sivisussuseqarsinnaanissaat naatsorsuutigaa.

Politiit rustjebanemik misissuinerat naammassippat nuannaarniut ingutserneqarlunilu peerneqassaaq.

/ritzau/