Tunillatsissimasut nutaat pillugit aqaguutinnagu saqqummiussisoqassanngitsoq – nakorsaaneq akiuussusersuinermi ulapittoq
Nunatsinni tunillatsissimasut tallimanngormat 233-upput.
Maanna qassit tunillatsissimanersut ilisimaneqanngilaq. Kisitsisimmi tallimanngormalli nutarterneqanngillat – taakku aqagortinnagu misissorneqarnavianngillat.
Nakorsaaneqarfik taama nalunaaruteqarpoq.
Akiuussuserneqarsimasut procentinngorlugit
71 procentit siullermeertumik kapitissimapput
67 procentit aappassaaneertumik kapitissimapput.
Pingajussaanik – boosterimik – kapitinnissaq periarfissaaleqqammerpoq.
Nakorsaanerup, Henrik L. Hansenip nakorsaaneqarfimmilu nakorsap, Paneeraq Noahsenip nuummiunut timersortarfimmi Inussivimmi sakkortusaataasumik boosterimik kapuinermik ulapputeqarnerat tamatumani pissutaavoq.
- Taakku marluullutit maanna kapuinissaat salliupparput, attaveqaqatigiinnermut akisussaasoq, Lars Damkjær oqarpoq.
Sooruna allanik tunillatsissimasut kisitsisaannik akuersisartoqanngila?
- Kisitsisit eqqorluartuunissaat pissutaavoq. Kisitsisit aasap tungaanut saqqummiunneqartartut tamatigut eqqorluartuuneq ajorput. Kisitsisit misissorluarneqartussaapput, nakorsarlu journalinik misissuisinnaasoq kisimi taamaaliorsinnaavoq.
Tunillatsissimasut amerlerujussuartut
Nunatsinni tunillatsissimasut amerlassusaat – nunarsuarmi sumiiffippassuarnitulli – novembarip decembarillu ingerlanerani amerlerujussuarput.
Danmarkimi coronavirusimik tunillatsissimasut nutaat ullup ataatsip kingulliup ingerlanerani 13.558-iusut, Statens Serum Institutip kisitsisaataasa takutippaa.
Tuniluuttoqalerneranit ullup ataatsip ingerlanerani paasineqartut aatsaat taama amerlatigipput. Coronavirusillu ilaat omikron tuniluunnerpaallunilu siaruariartorpoq.
Omikronimik tunillatsissimasumik nunatsinni suli paasisaqartoqanngilaq, nakorsaanerulli, Henrik L. Hansenip oqarnera naapertorlugu piffissaq apeqqutaaginnalerpoq.
- Omikron Danmarkimi tuniluutingaatsiarpoq, Islandimi tuniluuppoq, ullullu kingulliit ingerlanerani Savalimmiuni aamma sukkasuumik tuniluulluni. Omikron juullikkunni angalasunit aamma tikiunneqassaaq.
AAMMA ATUARUK Tamaat isigalugu: Coronavirus pillugu killiffik
- Juullillu nalaani nunatsinnut tikeraartut aamma nassatariumaarpaat. Qularinngilluinnarparput nunatsinni aamma sukkasuumik tuniluutissasoq, Henrik L. Hansen 40-leereersimasut pingajussaannik kapitinnissamut innersuussuteqaatigaluni KNR-imut sapaatiummat oqarpoq.
- Tunillatsissagaluaraanni napparsimarulussutiginianngikkaanni tassa pingajussaa akiuussusertittoqartariaqarpoq, ajoraluartumimmi nunatsinnimi piffissap sivikitsuinnaap iluani tuniluutipiloortussaavoq.
Nuummi tunillatsissimasoqarnerpaasoq
Boosterimik tassa sakkortusaataasumik kapitinneq akiuussusertinnerit siulliit marluk qaammatit sisamat affarlu qaangiunnerani aatsaat pissarsiarineqarsinnaavoq.
Nunatsinni tunillatsissimasut novembarip naanerani amerlanerpaalerput, tassani coronamik tunillatsissimasut katillugit 300-uupput.
Tallimanngornermit tunillatsissimasut kisitsisaat naapertorlugit tunillatsissimasunit 233-nit 168-it Nuummiipput.
