Nunata nakorsaanera: Pingajussaani akiuussusertigit, omikroni nunatsinnut anngutilerpoq
Nuummi innuttaasut 40-leereersimasut pingajussaanik akiuussusertinnissaanik, nunata nakorsaanerata, Henrik L. Hansenip kaammattorpai, coronammi allannguutaa omkron nunatsinnut anngunnissaa maanna qularutigiunnaarpaa.
Henrik L. Hansen pingajussaanik akiuussusertinnissaq pillugu qanoq saqqummiussassaqarpiq?
- Corona napparsimarulussutigerusunngikkaanni, 40-llu sinnerlugu ukioqaraanni, taava pingajussaa akiuussusertinnissamut maanna kapitittoqartariaqarpoq.
-Coronammi allannguutaa omikroni sukkasoorujussuarmik maanna tuniluuppoq. Taanna massakkut Danmarkimi annertuumik tuniluuppoq, Islandimi Savalimmiunilu sukkasuumik tuniluutilereerpoq.
- Juullillu nalaani nunatsinnut tikeraartut aamma nassatariumaarpaat. Qularinngilluinnarparput nunatsinni aamma sukkasuumik tuniluutissasoq, Henrik L. Hansen, oqarpoq.
AAMMA ATUARUK Naalakkersuisut: Juulli qanilliartorpoq, immissinnut paarigitsi
Nakorsaaneq Henrik L. Hansen Taava pingajussaanik akiuussusertinniaraanni qaqugukkut akiuussusertittoqassava?
- Nuummi 40-leereersimasut tamaasa ataasinngornermi marlunngornermilu akiuussusertissinnaapput. Tunillatsissagaluaraanni napparsimarulussutiginianngikkaanni tassa pingajussaa akiuussusertittoqartariaqarpoq, ajoraluartumimmi nunatsinnimi piffissap sivikitsuinnaap iluani tuniluutipiloortussaavoq.
Akiuussusertinneq iluaqutissatuaavoq
Akiuussusertinnerit siulliit marluk qaammatit sisamat affarlu qaangiunnerani aatsaat pingajussaani akiuussusertoqarsinnaavoq, tassalu Nuummi akiuussusertissimasut amerlanerpaartaat tamanna angoreerpaat. Aamma suli akiuussusertissimanngikkaanni immaqaluunniit aataasiaannaq akiuussusertissimagaanni taava aamma akiuussusertinnissaq ataasinngornermi marlunngornermilu periarfissaavoq.
- Massakkut imikkuullarilluinnartumik inissisimavugut, tassa tuniluunneq annertooq unitsissinnaanngisarput massakkut ingerlaarpoq.
AAMMA ATUARUK 40-leereersimasunut sioqqutsisumik pingajussaanik akiuussusersuisoqalertoq
- Tuniluunnerullu annikillisissinnaanissaa naatsorsuutigisinnaanngilarput, tamannami misilinniareeraluarparput iluatsinngitsoorpoq. Coronap allanngortoq Nuummi tuniluutingaatsiassaaq, piffissallu sivikitsup ingerlanerani nunatta sinneranut siaruaatissalluni.
- Tassalu sakkussatuarput tassaavoq akiuussusertinnissaq, taamaammat neqeroorut tigujuk, nunatsinni nakorsaaneq, Henrik L. Hansen KNR-imut ullumi taama oqarpoq.
Sapinngisamik amerlanerpaat akiuussusertillik
Nuummi pingajussaaneerluni aamma aappassanik siullermilluunniit akiuussusersuinissaq Inussivimmi, ataasinngornermi decembarip ulluisa 20-ani marlunngornermilu decembarip ulluisa 21-ani nalunaaqutaq ullaakkut qulingiluat qeqqaniit ualikkut tallimap tungaanut akiuussusersuisoqassaaq.
Innuttaasut 55-ileereernikut ataasinngornermi, 40-leereernikullu marlunngorpat akiuussusersorneqassapput, kisianni 40-leereersimasut ullut taakku arlaanni takkuppata itigartinneqarnavianngitsut nakorsaaneq ilisimatitsivoq.
Paasisaqarnerorusukkuit corona.nun.gl alakkarsinnaavat.
