Tunillatsittorpassuit paasineqareersullu: Tusagassiortunik nal. 14.00 katersortitsisoqassaaq
Coronavirusip nunatsinni tuniluunnera pillugu tusagassiortunik nal. 14.00 katersortitsisoqalerpat Nunatsinni nakorsaaneq Henrik L. Hansen, Naalakkersuisut siulittaasuat Múte B. Egede, aamma peqqinnissamut naalakkersuisoq Kirsten Fencker peqataassapput.
Tunillatsissimasut aatsaat taama amerlatigilerput, taamaattumillu killilersuutinik nutaanik saqqummiussisoqarnissaa ilimanarsinnaavoq.
Inuit katillugit 604-t coronavirusertutut ippassaq nalunaarsorsimapput, aatsaallu siullermeerluni coronavirusertut 600-nik amerlanerupput.
Kommuneqarfik Sermersuumi Nuummilu tunillatsissimasut amerlanerpaapput. Nuummimi januaarip aappaani misissortittuni 757-usuni 158-it, tassa 20,9 procentii tunillatsissimapput. Nunatsinnilu nakorsaanerup oqarnera naapertorlugu coronavirusi Nuummi tuniluutipiloorpoq.
Aamma Ittoqqortoormiini Qeqertarsuatsiaanilu tunillaassuisoqarpoq. Kangerlussuarmilu aamma tunillaassuisoqarluni.
Omikron nunatsinnut anngutereerpoq
Ilulissani januaarip pingajuani misissortissimasut tamarmik tunillatsissimasut, Ilulissani qitiusumik napparsimmaviup Facebookimi quppernermini allaaseraa. Tamannali qularnartoq Nunatsinni nakorsaanerup Henrik L. Hansenip Sermitsiaq.AG-mut oqaatigaa. Taamaattoq omikron Ilulissanut anngussimasutut nalilerpaa.
Omikronip nunatsinnut anngussimanera suli uppernarsarneqanngilaq, kisianni tassa nakorsaanerup tamanna qularutiginngilaa.
- Allannguut nutaaq Omikron Kalaallit Nunaannut tikiussimasoq pissutsit naapertorlugit qularinngilarput, nakorsaaneq KNR-imut sapaatip akunnera kingulleq taama oqarpoq.
Tunillatsissimasorpassuuppummi:
- Misissugassaatitta ilaat Danmarkimi misissugassanngorlugit nassiuppagut. Maannakkummi nappaatip sukkasuumik tunillaassuutilernerata ersarissumik takutippaa, maanna tuniluuttoq siornatigut takusariikkatsinnit sukkanerusumik tuniluuttoq, Henrik L. Hansen nassuiaavoq.
Sumiiffiit ilaani killilersuinerit
Killilersuutit assigiinngitsut nunatsinni atuupput, assersuutigalugu neriniartarfinnukassagaanni imerniartarfinnukassagaanniluunniit coronapasimik takutitseqqaarnissaq piumasaqaataavoq.
Aamma Nuummi, Qasigiannguani, Kangerlussuarmi Upernavimmi nunaqarfiinilu aqqaneq-marlunnik ukioqalereersimasut pisiniarfinnut isissagunik, bussinut ilaassagunik taxassagunilluunniit qanermut assiaquteqarnissaat piumasaqataavortaaq.
