Tusagassiuutit: Savalimmiut ukrainemit qimaasunik 200-nik najugaqarsinnaatitsiniartoq

Savalimmiuni inatsisartut Lagtinget ukrainemit qimaasunut Savalimmiuni ukiuni marlunni najugaqarsinnaatitsinissamut akuersissuteqarnissamut siunnersuut pinasuartumik pingasunngornermi oqallisigilerpaat.

Taanna aallaqqaammut qimaasunut 200-nut najugaqarsinnaatitsinermik akuersissuteqarfiussaaq.

Savalimmiuni nutaarsiassaqartitsivik allappoq.

AAMMA ATUARUK Ruslandimut kinguneqartitsinerit Savalimmiut tapersersorpaat

- Savalimmiormiutut pisinnaatitaaffeqassapput, Savalimmiuni inuussutissarsiornermut naalakkersuisoq Magnus Rasmussen, Sambandspartietimeersoq, Kringvarp Føroyamut taama oqarpoq.

Taassumalu Ukrainemit qimaasut pisortatinit ikorsiissuteqarfigineqarsinnaanissaat taakkulu savalimmiormiutut innuttaasutut isigineqarnissaat ilanngullugu paasissutissiissutigaa.

Amerlanerusinnaasut

Qimaasut kisitsimmik P-mik savalimmiormiut inuup normuanik aaqqissuussisarneranik pissarsissasut taakkulu kissaatigigunikku isumalluutissaqarunillu erngertumik sulilersinnaassapput. Meeqqat atuariarsinnaassapput imaluunniit meeqqaniissinnaassapput aamma peqqinnissaqarfimmik atuisinnaassallutik.

Rusland Ukrainemik februaarip ulluisa 24-anni saassussimmalli Ukrainemiut 40-t Savalimmiunukarsimasut ilisimallugu, Savalimmiuni Røde Korsip oqaatigaa.

AAMMA ATUARUK Parisimi isumaqatigiissummi Savalimmiormiut periusaat atorneqarusuppoq

Qimaasut 200-t Savalimmiunut tikitsinneqarsinnaanissaat siunnersuummi allassimavoq, inuimmi taama amerlatigisut maannamuugallartoq tikitsinneqarsinnaasut nalilerneqarmat. Kingorna amerlanerusinnaasut aamma oqaatigineqarpoq.

Qimaasunik Savalimmiunut ukiup sinnerani tikilluaqqusinissaq 15,5 millionit koruuninik akeqarnissaa naatsorsuutigineqarpoq. Savalimmiuni nutaarsiassaqartitsivik taama allappoq.