Ukrainemiut namminiilivilernertik ukiunik 31-nngortorsioraat
Ullumi pingasunngornermi ulloq tassaavoq Ruslandip Ukrainemik saassussinerata ukiup affanngornera. Ruslandimmi sakkutuui Ukrainemut februaarip ulluisa 24-anni isaapput.
Ruslandip Ukrainemik saassussinerata ukiup affanngornera eqqorlugu Ukrainemi inuiattut ullumi pingasunngornermi ullorsiortoqarpoq, ullumimi ulloq tassaavoq Ukrainep Sovjetunioniusimasumit avissaarluni namminiilivilernerata ukiunik 31-nngortorsiorfia.
Ukrainep kujasissortaani qeqertaasaq Krim Ruslandimit siusinnerusukkut tiguarneqareerpoq, Ukrainellu kangimut kujasissortaa Ruslandimit maanna aamma tiguarneqarluni.
Eqqisseqatigiinnissamut isumaqatigiinniarnerit kingulliit ukioq manna marsimi ajalusoorput, Ukrainemilu sorsunnerup soraarnissaa maannangaaq ilimanarpallaarani.
AAMMA ATUARUK Russit Ukrainemi atomimik nukissiorfik matunialersaaraat
Russit peqqarniitsumik saassussisinnaanissaat, Ukrainep præsidentiata Volodymyr Zelenskyj-p Ukrainemi inuiattut ullorsiortoqarnissaata qanilliartornerani mianersoqqussutiginikuuaa.
Inuiattut ullorsiornissamut atatillugu innuttaasut tamanna pillugu aarleripput.
Illoqarfiit pingaarnersaanni Kyivimi innuttaasut katerissinnaanissaat Ukrainemi oqartussanit inerteqqutigineqarpoq, inuppassuimmi katerissimasut russinit saassunneqaratarsinnaanerat aarleqqutigineqarmat.
Ukrainemiorpassuit nunani tamalaani ingerlaaqatigiipput, soorlu Kroatiami Maltamilu, Ukrainellu sakkunik tunissuteqarfigeqqinneqarnissaa USA-p aamma aalajangerpaa. 15,5 milliardit koruunit nalinginut ikiorsiisoqarniarpoq.
Ukraine Sovjetunioniusimasumit 1991-imi avissaarpoq. Ukrainep namminiilivinnissaa Ukrainemi innuttaasut akornanni amerlanerussuteqartut taamanikkut taasissutigivaat.
