Ukrainep illersornissamut inuit sillimmatit aggeqquai
Ukrainep massakkut illersornissamik sulisut sillimmatit 18-iniit 60-inut ukiullit sakkutooqaarfinnut saaffiginneqqullugit naalakkerpai.
Tamanna pivoq Kijev-imi sakkuttooqarfik nalunaaruteqarmat præsident Volodimir Zelenskij peqqussuteqartoq.
Marlunngormat Volodimir Zelenskij nalunaarpoq sillimmatit aggersarniarlugit
Ukrainep nalunaarutaa takkuppoq Ruslandip præsidentia Vladimir Putin russit inatsisartuinit overhusimit akuerineqareersorlu Ukrainep kangisissuani nunap immikkoortuinut marlunnut Donetskimut aamma Luganskimut sakkutuunik aallartitsinnaasoq.
Ruslandip nunat immikkoortui taakku marluk namminersulersutut akuerai.
Nunap ilaanut russit nunamiittut immikkoorniaqarfianuinnaanngitsoq kisianni nunap immikkoortuinut tamanut atuuppoq.
Nunap immikkoortui russit namminersortutut akuerisai immikkoorniat oqartussaaffiannit annerupput.
Ruslandip Ukrainep nunap ilaanik marlunnik taakkuninnga namminersortuunerannik akuersinera Nunanit killernit annertuumik isorineqarpoq annertuunillu kinguneqartitsilluni.
Inuinnaat sakkunik tigumiaqarnissaminnut pisinnaatitaaffeqassapput
Nalagaaffiup isumannaatsuunissaanut atorfilik qaffasissumik inissisimalluni akiusussaasoq Reuters naapertorlugu oqarpoq Kijevimi naalakkersuisut nunami tamarmik ajornartoornermi pissutsinik atuutilersitsinissartik pilersaarusioraat - nunap immikkortui Donetsk aamma Lugansk eqqaassanngikkaanni.
Reuters aamma allappoq inatsisartut ilaasortaasa taasisitsinermi inuinnaaat sakkoqartarnissamik pisinnaatitaafeqarnissaat akuerigaat.
AAMMA ATUARUK Ilisimatooq Ukrainimi pisunut: Kalaallit Nunaata aningaasaqarneq politikiluunniit qinertariaqalersinnaagai
Pingasunngormat Ukrainemi pisortatigut oqartussaasut nunap inuinut Ruslandimut aallannginnissaq innersuutigaat. Aamma Ukrainimiut Ruslandimi najugaqartut "massakkorluinnaq" Ukrainemut angerlaqqullugit kaammattorpaat.
Ukrainemiorpassuit Ruslandimi sulisarput. Imaaliallaannaq angerlaraluarunik sulitsik annaassavaat. Aammalu ilarpassuisa akerleriinnermi Rusland illersorpaat.
USA-mut ”Maleruutiinnartoq” nunasiarlu
Nutaarsiassaqartitsivik Tass naapertorlugu Ukrainemi immikkoorniaqarfimmi Donbass-imi inuit milliuunit ataatsit missaat russisut innuttaaniarlutik qinnuteqarsimapput. Assigaa nunap ilaata inuisa sisamararterutaat.
Sapaatip akunnerata naanerani russit nutaarsiassaqartitsiviat allappoq nunap ilaani tassani inuit 770.000-init amerlanerusut Ruslandimi inuuttaasutut allagartartaarsimasut.
Immikkoorniaqatigiit russinit tapersersorneqartut tallimanngormat inuit 700.000-t Donetskimit qimagutitiortortilerpaat.
Ilutigalugu immikkoorniaqatigiit russinit tapersersorneqartut pisortaat sorsunnissamut tamakkiisumik piareersarnissamut naalakkiipput. Angutit tamarmik sakkumik tigumiarsinnaasut nalunaarnissaminnut naalakkerneqarput.
AAMMA ATUARUK Rusland Ukrainep kangianut kunngiitsuuffinnut immikkoornianut sakkutuunik aallartitsivoq
Ruslandip Donbassimi nunap immikkoortui - Lugansk aamma Donetsk – attaviitsutut namminersortutut akuerai.
Nunap ilaata ilaannaajunngitsumut immikkoorniaqatigiit russinut iliusunit aqunneqartut kisimik pinnatik kisianni nunap ilaa tamakkerlugu pineqarpoq.
Taamaalillutik nunap ilai russit namminersortutut akuerisai immikkoorniaqatigiit aqutaannit annerupput.
Sapaatip akunnerata matuma ilaani siusinnerusukkut russit præsidentiat Vladimir Putin oqarpoq Ukraine ilumoortumik naalagaaffiunngitsoq. Kisianni akerlianik nuna USA-mut ”maleruutiinnartuusoq” ”nunasiaallunilu”, oqarpoq.
EU-kommissionimi siulittaasup Ursula von der Leyen-ip russit iliuuserisaat taavaa "nunat assigiinngitsut akornanni isumaqatigiissutinik aamma Minskimi isumaqatigiissummik annertuumik unioqqutitsineq".
