Rusland Ukrainep kangianut kunngiitsuuffinnut immikkoornianut sakkutuunik aallartitsivoq

Ukrainep kangiani nunaminertani immikkoorniani Luganskimi Donetskimilu sakkutuuliisoqarnissaa, Ruslandip præsidentiata Vladimir Putinip illersornissamut ministereqarfimmut peqqussutigaa

Sakkutuut Ukrainemi eqqissisimasoqarnissaanik nakkutilliisussatut Ukraineliartinneqarniartut Putinip oqaatigaa.

Nutaarsiassaqartitsivik reuters naapertorlugu tamanna peqqussutini marlunni, Putinip ataasinngornermi atsiugaani takuneqarsinnaavoq. Luganskip Donetskillu namminersulernerannik akuersinini takutinniarlugu peqqussutit Putinip atsiorpai.

Sakkutuut qassit Luganskiliartinneqarlutillu Donetskiliartinneqarniarnersut ilisimaneqanngilaq. Russillu sakkutuui qaqugu Ukrainep kangisissuanukartinniarneqarnersut ilisimaneqanngilaq, sunalu suliassarineraat aamma ilisimaneqarnani.

Assuarineqarpoq 

Ruslandip Luganskip Donetskillu namminersulernerannik akuersinera nunanit killernit amerlasuunit assuarineqarpoq.

Ruslandip iliuuserisaasa kinguneqarnissaat, EU-p, USA-p Tuluillu Nunaata oqaatigaat, Ruslandimmi aningaasarsiornera eqqorniarlugu immikkut ittumik sukannersumillu iliuuseqartoqalernissaa aarlerisaarutigaat.

Rusland Ukrainep namminersortuuneranik innarliisoq, Naalagaaffiit Peqatigiit qullersaata António Guterresip ataasinngornermi oqaatigaa. 

AAMMA ATUARUK Putin aamma Biden Ukrainemik aaqqiagiinnginneq pillugu naapissinnaapput

Ruslandip Ukrainep kangisissuani immikkoorniat namminersulerniarnerannik akuersinera sorsukkumalernermik nalunaaruteqarneruvoq, Anders Puck Nielsen taama isumaqarpoq. Taanna sakkutuuni imarsiortuni naalagaavoq, illersornissamillu ilisimatusarfik, Forsvarsakademi, sinnerlugu illersornissamut tunngasuni naliliisartuulluni.

- Sorsuttoqaleratarsinnaaneratut isikkoqarpoq, Ruslandip annerusumik angusaqarniarneratut isikkoqarluni, taanna oqarpoq.

Qamutit assakaasullit erfalasoqanngitsut 

Ukrainemi siunissaq ungasinnerusoq eqqarsaatigalugu sorsulivittoqarsinnaaneranik kinguneqarsinnaasoq, sakkutuuni imarsortuni sakkuttuut naalagaat illersornissamut tunngasuni naliliisartup oqaatigaa.

Nutaarsiassaqartitsivimmit Reuters-imit tusagassiortoq marlunngornermut unnuaani nalunaarpoq Ukarinep kangissortaani Donetskimi sakkutuut qamussui assakaasullit sorsuutit amerlasoorsuit takusimallugit. Qamussuit aassakaasullit erfaloqarpasinngillat.

Anders Puck Nielsenip russit sakkutuuinut taaguutigineqartoq "eqqissisimasoqarnissaa pillugu" minnerpaamilluunniit upperinngilaa.

- Sorsunneq taanna Ruslandip nammineq aallartitaraa. Ataatsimilluunniit takussutissaqanngilaq Ukrainep saassussiniarnermik ingerlatsineranut, russit taamaattoqarneraallutik oqarnerattut.

- Taamaattumik saakkutuut eqqissimatitsiniartuunerat takujuminaatsorujussuuvoq. Tassaarpasinneruvoq Ukrainep nunataanut sakkutuunik inissiinermut utoqqatsissutissaannavik, Anders Puck Nielsen oqarpoq.