Ulloq nikerarfiusoq: Inatsisartuni ataatsimiititaliani siulittaasut nutaat aajuku
IA-p Siumullu naalakkersuisoqatigiinnissamut ataasinngornermi isumaqatigiissuteqarnerat Naalakkersuisuni atuuffinnik kisimi nikerarfiunngilaq. Isumaqatigiissuteqarnermi aamma pissutigalugu Inatsisartuni ataatsimiititaliani atuuffiit aamma nutaamik inissititerneqaqqissapput.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Taakku ulloqeqqata-tungaani inissititerneqarput. Naleqqap Naalakkersuisoqataajunnaarneratigut ataatsimiititaliani politikkikkut allanngortoqarpoq.
Kikkut ataatsimiititaliani tallimani assigiinngitsuni siulittaasunngorlutillu siulittaasumut tullersortaalernersut uani atuarsinnaavatit:
Siumut Aningaanut Akileraartarfimmullu ataatsimiititaliamiilersoq
Aningaasanut Akileraartarnermullu ataatsimiititaliami Siumumeersoq Hans Peter Poulsen siulittaasunngorpoq, Jens Frederik Nielsenilu Demokraatineersoq siulittaasup tullersortigilerlugu. Taakku atuuffiit siulittaasuusimasumit Jens Napaattuumit kiisalu siulittaasup tullersortaanit Erik Jensenimit nangippaat.
Aalisarnermut, Piniarnermut Nunalerinermullu ataatsimiititaliami Hans Aronsen Inuit Ataqatigiinneersoq siulittaasunngorpoq, Jens Frederik Nielsenilu Demokraatineersoq siulittaasumut tullersortaalerluni. Taakku atuuffiit siulittaasuusimasumit Jens Napaattuumit aamma siulittaasup tullianit Siumumeersumit Aslak Jensenimit nangippaat.
Demokraatit siulittaasup tulliatut arlalinnik atuuffeqalersut
Nunanut allanut tunngasunut ataatsimiititaliami aamma nikittoqarpoq. Pipaluk Lynge Rasmussen Inuit Ataqatigiinneersoq siulittaasunngorpoq, Anna Wangenheimilu Demokraatineersoq siulittaasumut tullersortaalerluni. Taamaalilluni Naleqqamit Jens Napaattooq ataatsimiititaliani siulittaasuuffini qimappai. Siumumit Vivian Motzfeldt uani siulittaasumut tullersortaagaluarpoq.
AAMMA ATUARUK Nuummiut om ny koalition: Det er overraskende og lidt skuffende
Ilaqutariinnermut Peqqinnissamullu ataatsimiititaliami Agathe Fontain Inuit Ataqatigiinneersoq kiisalu Demokraatinit Anna Wangenheim siulittaasutut siulittaasullu tulliatut atuuffeqaraluarput. Maanna Hans Peter Poulsen Siumumeersoq Siulittaasuulerpoq, Anna Wangenheimilu Demokraatineersoq siulittaasumut tullersortaalerluni.
Inuussutissanut Aatsitassanullu ataatsimiititaliami Inuit Ataqatigiinneersoq Asii Chemnitz Narup siulittaasuugaluarpoq, Siumumiillu Karl Tobiassen siulittaasumut tullersortaagaluarluni. Maanna Mariane Paviasen Inuit Ataqatigiinnersoq siulittaasunngorpoq, Aqqalu Jerimiassenilu Atassummeersoq siulittaasumut tullersortaalerluni.
Kikkut ataatsimiititalianut assigiinngitsunut aamma toqqagaanersut uani allattorsimaffimmi takusinnaavatit.
