Ungarnimi suiaaqatiminoortut meeravissiartaarsinnaajunnaartut

Ungarn suiaaqatinoortut pillugit inatsiserpaalunnik atuutilersitsivoq.

Ungarnimi naalakkersuisui nunami ileqquttoqanik naleqartitsisutut imminnut taasut piffisami kingullermi iliuuseqarput.

Inatsit atuutilerpat, suiaqatinoortut meeravissiartaarsinnaajunnaassapput.

Meeravissiartaarsinnaaneq katissimasunut taamaallaat periarfissaavoq, Ungarnemilu angut arnarlu kisimik katissinnaapput.

Inunngornermi suiaassutsimik allannguisinnaaneq, Ungarnip tunngaviusumik inatsisaanik allannguinermi aamma inerteqqutaalerpoq.

Inatsisissatut siunnersuuterpaaluit Ungarnimi inatsisartuni amerlanerussuteqarluartunit tapersersorneqarlutik marlunngornermi taasissutigineqarmata atuutilersinneqarput. Inatsisini nutaani immikkut akuersissuteqartoqarsinnaavoq, taakkuali Ungarnimi ilaqutariinnut ministerimit akuerineqassallutik.

Ungarnimi inatsisartut inatsimmik allamik maajip qaammataani atuutilersitsipput, tassani suiaassutsimik allannguisinnaaneq inerteqqutigineqalerluni.

Ungarnimi inuit pisinnaatitaaffii pillugit suliniaqatigiiffiup Amnesty Internationalip pisortaa, David Vigip, tamanna Ungarnimi suiaaqatinoortut suliniaqatigiiffiinut inuillu pisinnaatitaaffiinut alianartutut taavaa.

- Inatsisit nutaat assigiinngisitsisut suiaqatiminoortartunullu inuuluuginnittut inatsisartuni tuaaviinnaq atuutilersinneqarput, coronap tuniluunnera patsisiullugu. Tassuuna takutiinnarpaat, Ungarnimi oqartussat suiaaqatiminoortut suliniaqatigiiffiinut saassussisarnerisa kingulliti ilagigaat, David Vig oqarpoq.

EU-p Ungarnimi inatsisit malittarisassallu, EU-p tamat oqartussaaqataanissaannik anguniaagaanut assortuisuusut, arlaleriarlugit isornartorsioreerpai.