USA-p aallartitaa nunatsinneeqqammertoq: Kalaallit Nunaat amerikamiut illersornissaannut pingaaruteqartorujussuusoq
USA-p Danmarkimi aallartitaa sapaatit akunnerata siuliani nunatsinniippoq.
Tusagassiortup taavalu ”Taamani Trumpip Kalaallit Nunaat pisiarinialeraluallarmagu”-mik atuakkiortup oqarnera naapertorlugu USA-p nunatsinnik qangaligami soqutiginninnera Kalaallit Nunaannik atassuteqarluarusuttuarneranik ersersitsineruvoq.
- USA-p Danmarkimi ukiuni makkunani aallartitai tamarmik Kalaallit Nunaannik atassuteqarluarnissaq suliassaasa pingaarnerit ilagigaat nunanut allanut tunngasunut ministereqarfigisaminnit ilisimatinneqarsimassasut ilimagaara, Martin Breum oqarpoq.
Nunatsinniinnermini alutorsaqaluni naalaarniarlunilu maanngarluni, USA-p Danmarkimi aallartitaa KNR-imut oqarpoq.
- Naalaarniarlunga maanngarpunga. Kalaallit Nunaannik atassuteqartuarnissaq salliutilluinnarpara. Taamaammat maaniinnera nuannaarutigaara, Alan Leventhal oqarpoq.
Tamanna ilumoortoq, Martin Breum isumaqarpoq.
- Kalaallit Nunaanni naalakkersuisut, inuussutissarsiortut ilinniarfeqarfiillu sutigut suleqatigiikkusunnersut siunersiartorlugu tikeraarpoq, taamaalioreeruni kalaallit sunik kissaateqarnerannik Washingtonimi nunanut allanut ministereqarfimminut nalunaaruteqareeriarpat atassuteqarnerminni sutigut suleqatigiissanerlutik aalajangiisoqassaaq, taanna oqarpoq.
Nunarput USA-p sillimaniarneranut pingaaruteqartoq
Martin Breumip oqarnera naapertorlugu nunarput USA-p ingammik sillimaniarneranut pingaaruteqarmat amerikamiut nunatsinnik atassuteqarluarnissaminnik pingaartitsipput. Nunarpummi Amerikap nunavittaanut ilaagami USA-mut pingaaruteqarpoq.
- Kalaallit Nunaata Amerikap nunavittaata avannaani inissisimanera USA-p avannaata tungaanit saassunneqariaannaannginnissaanut pingaaruteqarpoq, Martin Breum oqarpoq.
Tassami USA soorlu Ruslandimit immaqalu Kinamit rakettinik qaartartunik saassunneqarataannaavoq.
- USA-p nunanit pissaanilissuarnit saassunneqarataannaanera eqqarsaatigalugu Kalaallit Nunaat amerikamiut sillimaniarnerannut pingaaruteqarluinnarpoq, Martin Breum oqarpoq.
AAMMA ATUARUK Amerikap Danmarkimut aallartitaat Nunatsinnut tikeraarpoq
Taamaammat nunatta USA-llu atassuteqaqatigiilluarnissaat pingaartinneqaqaaq. Tamannalu ilaatigut USA-p sakkutooqarnikkut sulianik sakkortusaariaannaajumalluni soorlu Danmarkimi aallartitaata Leventhalip nunatsinnut tikeraarneratigut qulakkeerniarneqarpoq.
- USA Kalaallit Nunaanni sakkutooqarnikkut suliaminik qaquguluunniit periaannaasumik sakkortusaasariaqalissaguni isumaqatigiissuteqareersimanngikkunik isumaqatigiissusiulertupallassinnaarusullutik sapinngisamik akimmisaarneqannginnissi pingaartippaa.
- Amerikamiut Kalaallit Nunaannik atassuteqarluarusunnerat tusarnartaanngilaq. Ukrainemi maanna sorsuttoqarnera eqqarsaatigalugu atassuteqarluarnissaat qaquguluunniit pisariaqaleriaannaavoq, Martin Breum oqarpoq.
USA nunatta soqutigisaanut taperseerusuttoq
Alan Leventhal nunatsinniinnermini Naalakkersuisut siulittaasuallu Muté B. Egede (IA) naapikkamik nunatta anguniagaanut tunngasunik eqqartueqatigiipput. Eqqartueqatigiinnerminnili oqaaseqarpiarani alaatsinaanneruvoq.
- Kalaallit anguniagaat naalaarusullugillu taakkua piviusunngortinnissaannut taperseerusullungalu qanoq tapersiisinnaanerluta paasiniarpara. Tassa taakkorpiaat siunertaralugit eqqartueqateqarpunga, Alan Leventhal oqarpoq.
AAMMA ATUARUK Amerikamiut Danmarkimi nutaamik aallartitartaartut
USA-llu nunatsinnik ingammik inissisimanera peqqutigalugu soqutigiginninnera eqqarsaatigalugu nunatta USA-mik suleqateqarnini pissarsiaqaatigissagaa, Martin Breum oqarpoq.
Soorlu USA-p nunatsinni ilisimatusarnermi, aatsitassarsiornermi ilinniartitaanermilu suliniutinut aningaasaliineratigut. Nunatta USA-mik suleqateqarnera Naalakkersuisut iluaqutigilluarsinnaagaat, taanna isumaqarpoq.
- Kalaallit Nunaata nunarsuarmi nunat aningaasaatilissuit ilaannik atassuteqarluarnini aamma iluaqutigilluarsinnaavaa, taanna oqarpoq.
Alan Leventhal Nuummiinnermini atuarfiit ilaannut pulaarlunilu inuussutissarsiortunik oqaloqateqarpoq. Nunatsinniinnerminilu silap pissusianik sermersuarmi Summit Stationimi ilisimatusartut aamma paasisassarsiorfigiartorpai.
