USA-p senatiata arnaq taartumik amilik eqqartuussiviit qullersaanni eqqartuussisutut toqqarpaa
USA-p senatiata uppernarsarpaa Joe Bidenip innersuussutigisaa Ketanji Brown Jackson arnanit taartumik amilinnit siullersaalluni eqqartuussiviit qullersaanni eqqartuussisuussasoq taasinermi senatimi taasissutigineqarmat 53-it akuersipput 47-t akerliusut.
USA-mi eqqartuussiviit qullersaanni eqqartuussisut 116-inissaattut qinerneqarpoq. Suliffik kinuuneq tamaat atuuffiuvoq.
Senatimi, republikanerit demokratillu 50 – 50-inik amerlaqatigiillutik taasisinnaaffianni, republikanerit pingasuinnaat taavaat.
Taassuma eqqartuussisoq kiffaanngissutsimik pingaartitsisoq Stephen Breyer juunip naanerani utoqqalilluni tunuartussaq taarsissavaa. Aatsaat taamaalippat Jackson eqqartuussisutut ikkutissaaq.
AAMMA ATUARUK Ministeriunerup Ruslandip Bornholmimut tunngatillugu mianersoqqussuteqarnera akuerinngikkaa
Eqqartuussiviit qullersaanni eqqartuussisut liberaliusut (kiffaanngissutsimik pingaartitsisut) akornanniilissaaq.
Kisianni tamatuma liberaliusut aamma konservativiusut (qanganisarsiortut) pissaanikkut avissimanerat allanngortissanngilaa. Tamatumani konservativit amerlanerussuteqarput 6-iugamik akerlii 3-llutik.
Aalajangernerup kinguninngua præsident Joe Biden Twitterimi allappoq:
- Eqqartuussisup Jacksonip eqqartuussiviit qullersaannut ikkunneqarnera naalagaaffiup oqaluttuarisaanerani eqqaamaneqartussanngorpoq. Maanna taama alloriarnitsigut kingumut qulakkeerlugu takuteqqipparput, USA-mi assigiinngissuteqarsinnaanerup siammasittuunera eqqartuussiviit qullersaanni aamma atuummat.
2021-miilli Brown Jackson 2021 District of Columbia eqqartuussivimmi ingerlatitseqqittarfimmi eqqartuussisutut sulivoq.
Tamatuma siornatigut distriktsdommeritut (nunap ilaani aalajangersimasumi eqqartuussisoq) ukiuni arfineq pingasuni sulivoq.
Aamma siusinnerusukkut eqqartuussiviit qullersaanni eqqartuussisoq tunuartussanngortoq Stephen Breyer sulissunnikuuaa.
AAMMA ATUARUK Paavi Canadami atuarfinni angerlarsimaffiutigisuni nunap inooqqavinik atornerluineq pillugu utoqqatsertoq
Joe Bidenip qineqqusaarnermi nalaanili oqaatigisareerpaa qinigaaguni amerikami eqqartuussiviit qullersaanni oqaluttuarisaanermi siullerpaamik arnamik taartumik amilimmik dommerimik atorfinitsitsiumaarluni.
Ketanji Brown Jackson nammineerluni arlaleriarluni oqartarpoq senatip akuerissagaani pisinnaasani tunngavigalugit.
Tamanna marsimi uterpaa, Senatimi toqqaanissamut suliaqarnermut atatillugu tusarniaanermi apersorneqarami.
- Angajoqqaakka alliartornerminni akimiffissarpassuaqarsimasut assiginagit aqqutissatra piareersarneqarsimavoq: Ilungersorlunga suliguma imminullu upperiguma USA-mi piffissami inooqataaffinni qanorsuarluunniit pisinnaalissasunga kissaatigisattullu inuuneqalersinnaassaa nga, taanna taama oqarsimasoq aviisimi Politikenimi issuarneqarpoq.
