Utoqqaat Illersuisuat: Utoqqaat illuinit matusinerit utoqqarnik kiserliortitsipput

Utoqqaat illuinik matusinerit utoqqaat kiserliulernerannik kinguneqarpoq.

Utoqqaat illersuisuat Inga Egede, tusagassiutinut nalunaarummi taama oqarpoq.

Taassuma nunatsinni utoqqaat illuini pissutsit sapaatit-akunnerini kingullerni misissorsimavai.

Kalaallit Nunaanni inuit 60-ileereersimasut maanna 7000-t sinneraat Isumaginninnermut, Suliffeqarnermut Nunamullu Namminermut Naalakkersuisoqarfiup nalunaarutaani takuneqarsinnaavoq.

Taakkunannga amerlasuut utoqqaat illuisa covid-19-ip tuniluunnerpaaffiata nalaani matoqqatinneqarnerisa nalaanni kiserliortunngorsimapput:

AAMMA ATUARUK Nunatta nakorsaanera: Utoqqaat akiuussutissamik januaarimi kapitissinnaalissapput

- Utoqqaat illersorniarlugit kommunit taama iliuuseqarnerat paasilluarsinnaavara, taamaakkaluartorli utoqqaat angerlarsimaffianniit aneqqusaannginneq ilaquttanillu pulaartoqaqqusiunnaarneq utoqqarnut kiserliornermik nassataqarsinnaammat erseqqissaatigissavara, utoqqaat illersuisuat Inga Egede oqarpoq.

Aasianni utoqqaat illuat coronavirusip utoqqaat illuanni tunilunnerani pulaartunut qanittukkut matoqqavoq.

Utoqqaat illuini aatsaat taama pisoqanngilaq.

Utoqqaallu mattusimalernertik pissutigalugu tarnimikkut nanertuuteqalersinnaanerat kommunit eqqumaffigisariaqaraat utoqqaat illersuisuata oqaatigaa:

- Kommunillu tinnersartariaqarsoraakka utoqqaat mattusimatinneqartut kiserliorpallaalinnginnissaat pillugu iliuuseqarfigineqarnissaannik, soorlu oqarasuaatikkut qarasaasiakkullu attaveqaatitigut ilaquttanik qanigisanik oqaloqatiginnissinnaaneq (facebookikkut allatigullu) kommuninit periarfissisinnaaneq ammaffigineqassasoq, utoqqaat illersuisuat Inga Egede taama ilaatigut siunnersuuteqarpoq.