Uumassusillit assigiinngisitaarnissaannut isumaqatigiissuteqartoqartoq
Uumassusillit assigiinngisitaarnerat pillugu nunarpassuit avatangiisinut ministerii Montrealimi COP15-imi isumaqatigiissuteqarput.
Uumassusillit assigiinngisitaarnerinut nunami uumassusillit uumasoqatigiillu tamarmik, soorlu naasut, uumasut, pupiit, issuatsiaat, tappiorannartut il.il., arferit annersaanniit immami, nunami, apummi serminilu tappiorannartunut ilaatinneqarput.
Tassaapput uumasoqatigiit aalisartakkagut, nuniattakkagut imaluunniit isiginnaaginnartakkagut, tassanilu aamma mikingaarmata isigisinnaanngisagut pineqarput. Tappiorannartut ataqatigiinneri uumasoqatigiit naleqqussarsinnaassusiinut, nunarsuarmilu allanngoriartortumi aniguisinnaassusiinut pingaaruteqarput.
Tigusiffik: Naalakkersuisut tusagassiuutinut nalunaarutaatNunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund, nunatta pinngortitaa pinngortitatsinnilu ataqatigiinnerit sunnertiasut pillugit kunngeqarfik Danmark sinnerlugu nunarpassuit avatangiisinut ministeriinut COP15-imi decembarip ulluisa 16-ianni oqalugiarpoq.
Danmarkimi naalakkersuisunngortitsisoqarmat, danskit avatangiisinut ministeriat, Magnus Heunicke, ataatsimiinnermut peqataasinnaanngilaq, taamaammallu Kalistat Lund oqalugiartuuvoq.
Nunarsuarmi nunarpassuit avatangiisinut ministerii nunarsuup uumassusiliisa assigiinngisitaarnerisa, tassalu uumasut naasullu tamarmik illersorneqarnissaannut ukiuni qulini atuuttussamik isumaqatigiissuteqarniarlutik naapipput.
Nunarsuarmi uumassusillit assigiinngissitaarnerisa ikiliartornerinik 2030 nallertinnagu unitsitsinissaq avatangiisinullu aamma uumassusillit assigiinngissitaarnerini tunngasut 2050-ip tungaanut pilerseqqinneqarnissaat siunertaapput.
Nunat inoqqaavisa pisinnaatitaaffii qulakkeerneqassasut
Nunat inoqqaavisa pisinnaatitaaffii isumaqatigiissummi ataqqinnissasut, Kalistat Lundip oqalugiarnermini erseqqissaatigaa.
- Mingutsitsinerit sialuttut aputitullu nakkaalinnginnerminni ungasissorsuarmut ingerlaartarput nunallu killeqarfii qaangertarlugit imaluunniit immat sarfai aqqutigalugit takkuttarlutik. Silap pissutiata allanngoriartornera Issittup uumassusiliinut sunniuteqarpoq, taamaalillunilu Issittumi nunat inoqqaavisa inuuniutaannut navianartorsiortitsilluni, Kalistat Lund COP15-imi ataatsimiinnermi oqarpoq.
Nunat inoqqaavisa pisinnaatitaaffiisa isumaqatigiissummi ataqqineqarnissaat illersorneqarnissaallu aamma erseqqissaatigaa.
- Nunat inoqqaavisa pisinnaatitaaffii pillugit Naalagaaffiit Peqatigiit isumaqatigiissutaat malillugu nunat inoqqaavisa nunartik, ilisimasatoqqatik piujuartitsisumillu atuinertik pillugit pisinnaatitaaffiisa ataqqineqarnissaat qulakkeertariaqarparput, Kalistat Lund oqarpoq.
Nunarput nunatta soqutigisaanik, pinngortitami anguniakkanik nunallu inoqqaavisa pisinnaatitaaffiinik tunngasunik qulakkeerinninniarluni nunarsuarmi isumaqatigiissutissap oqaasertassai pillugit isumaqatiginniarnerni ukiuni kingullerni sisamani suleqataavoq.
