Uummannami tassaarsuaqarataannaaneranut aarlerisoq: Ikiussanerarpaatigut, sulili taamaaliunngillat
- Taanna ajorluinnarpoq.
Uummannameersoq Jørgen Abelsen aarlereqaluni taama oqarpoq.
Karrat Kangerluannimi ajornerpaamik pisoqarluni tassaarsuaqqissagaluarpat, Uummannami peqqissaavik malissuarnit qaarussaarataannaavoq.
Uummannamimi peqqissaavik sissap killinganiimmat 2017-imi tassaarsuaqarnerani malissuartulli ittunit qaarussaariaannaavoq.
- Tassanngaannaq takkutissagaluarpat, pitsorluttut immaqaluunniit napparsimaviup sulisuisa angummassinnaanngilaat. Napparsimmavimmi uninngasoqangaatsiartarpoq, qanigisallu tamakku tassanngaannartumik sukkasuumik nutserneqassapput, Jørgen Abelsen oqarpoq.
Uummannami peqqissaaviup aarlerinaatilimmiinnera tusarnartaanngilaq.
Aarlerinaatilimmiittormi siorna maajimi nalunaarutigineqarpoq. Nalunaarutigineqareermalli iliuuseqarfigineqangaanngilaq. Taamaammat Jens Kristian Therkelsenip Siumumeersup Naalakkersuisut tamatumunnga qanoq pilersaarnersut aperai: Naalakkersuisummi Uummannami ilumut nutaamik peqqissaaviliulersaarnerpat?
Tamanna suli nalunarpoq. Atorfilittanimi tassaarsuaqarataannaaneranut tunngasunik sunik suliniuteqartoqarsinnaaneranik paasiniaaqqusimagini qaqugulu nutaamik peqqissaaviliortoqarnissaa suli aalajangerneqarsimanngitsoq, peqqissutsimut naalakkersuisup Mimi Karlsenip taamaallaat oqaatigaa.
Kalerrisaarutinik suli ikkussuisoqanngitsoq
Taannalu ajorluinnartoq, Jørgen Abelsen isumaqarpoq.
- Naalakkersuisut tamakkuninnga kalerrisaarutinik suliaminnik arriippallaaqaat. Naalakkersuisuniit eqqartorneqaraluarpoq ikkussorneqassasut, kisianni suliluunniit tamakku ikkussorneqanngillat.
Taanna qanoq igaajuk?
- Suliaq aallartimmalli ukiut tallimanngoreerput, sulili iliuuseqartoqanngilaq.
AAMMA ATUARUK Tassaarsuaqarataannaanera: Uummannami peqqissaaviup qanoq pineqarnissaa nalunartoq
Karrat Kangerluannimi qaqqaq nakkaarataannaasoq upalungaarsimasunit maanna nakkutigisaavoq. Inoqarfippassuillu ilaannut uligarataannaasunik malerujussuaqalissagaluarpat kalerrisaarutaasinnaasunik suli ikkussuisoqarnikuunngilaq.
Aatsitassanut naalakkersuisoqarfik kalerrisaarutinik qaammatip tulliani ikkussuititsissasoq, avatangiisinut naalakkersuisoqarfik paasissutissiivoq.
2017-imi tassaarsuaqartoq
Timmisartuaqqamilli ungasianiit aquttagaq atorlugu juulip aallartinnerani misissuisoqarpoq. Qaqqat misissorneqarput, qaqqallu ilaanni alapernaarsuiffiliortoqarluni. Tamaanilu qaqqamik nakkaasoqassagaluarpat alapernaarsuiffimmit kalerrisaarisoqarnissaa siunertaavoq.
Ujarassiuut nunatsinneersut, Danmarkimeersut Norgemeersullu Karrat Kangerluanni qaqqamit nakkaasoqarneranit kingunissat pillugit nalunaarusiartik siorna saqqummiuppaat.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq.
Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Paasissutissarsiffik: Namminersorlutik Oqartussat
Karrat Kangerluanni qaqqat nakkaarataannaasut pingasuusut nalunaarusiami tassani erseqqissarneqarpoq, taakkulu qaqqap tassaarsuaqarneranik kinguneqartumik 2017-imi nakkaasup qanittuaniipput.
AAMMA ATUARUK Nakorsaq Uummannami Peqqissaavik pillugu: Pilersaaruteqarpugut
Karrat Kangerluannilu qaqqaq nakkaarataannaasoq ataatsikkut nakkaraluarpat inoqarfinni soorlu Qaarsuni, Niaqornani, Uummannami, Saattuni, Ukkusissani Ikerasammilu malissuaqarnissaa aarlerisaarutaavoq.
Nunaqarfinnilu inuerunnikuni tassa Nuugaatsiami Illorsuarnilu aamma malissuaqarataannaavoq. Nunaqarfinni marlunni taakkunani 2017-imi tassaarsuaqarmat inuit sisamat ajunaarput.
Nunaqarfiit taakkua kingorna inuerupput.
Ujarassiuut qaammataasaniit assinik sapaatit akunnerannut qasseeriarlutik pissarsisartut, taamaalillutillu sumiiffik nakkutigigaat aammali nalinginnaanngitsumik nikingaatsiartaraluartoq qaqqap ilarujussua qaqugu nakkaarataannaannersoq siulittoruminaappoq.
Aqagu ukiulluunniit 200-t qaangiuppata perataannaavoq.
