Nunat tamalaat: Ukrainemiut kiffaanngissuseqarlik!
Ukrainemiut inuiattut ullumi pingasunngornermi ullorsiorput, Ruslandillu Ukrainemik saassussineranit qaammatit aamma arfinilinngorlutik.
Ukraine nunanit tamalaanit suliniaqatigiiffinniillu assigiinngitsunit tamanna pillugu ullumi aamma tapersersorniarneqarpoq.
Ministeriuneq Mette Frederiksen taakkununnga ilaavoq. Taassuma Ukrainep præsidentianik Volodymyr Zelenskyj-mik assileqatigineqarnermini asseq Facebookimini ullumi ikkuppaa.
- Ukraine kiffaanngissuseqartuaannassaaq. Tassami Ukraine tamarmi ukrainemiunit pigineqarpoq. Kiffaanngissuseqarusuinnarnerminnik sorsuuteqarnerat tapersersorparput. Pisariaqassappallu tapersersortuassavagut, Mette Frederiksen allappoq.
AAMMA ATUARUK Ukrainemiut namminiilivilernertik ukiunik 31-nngortorsioraat
Ruslandip Ukrainemik saassussinera Europap Sorsunnersuup kingulliup kingorna isumannaatsuunissaanut qajannarsisitsisoq, Nunat killiit illersoqatigiiffiata NATO-p qullersaata Jens Stoltenbergip oqaatigaa.
Tuluit Nunaanni ministeriunerujunnaalersup Boris Johnsonip Ukrainemik tapersersuinini Twitterikkut aamma allaaseraa.
Ukrainep ukiuni 31-ni namminiilivinnerani taanna pilluaqqusivoq, Ukrainelli namminiilivinnerata qajannarsisinneqarsimanera aamma oqaatigalugu.
Ukraine Sovjetunioniusimasumit 1991-imi aggustip 24-ani avissaarluni namminiilivittunngorpoq.
Ukrainep namminiilivittunngorneranut nalunaarut inuinut ukioq taanna decembarimi taasissutiugineqarmat inuit 90 procentii sinnerlugit akuersipput.
